The news is by your side.

Advertisement

پنجاب میں دھند کا راج : موٹر وے کے مختلف سیکشن ٹریفک کے لیے بند

لاہور : پنجاب کے مختلف میدانی علاقے دھند کی لپیٹ میں ہیں، کئی مقامات پرحدنگاہ صفر ہوگئی، دھند کے باعث موٹر وے کے مختلف سیکشن ٹریفک کے لیے بند کر دیئے گئے۔

تفصیلات کے مطابق لاہور، گوجرانوالہ، فیصل آباد، ملتان اور گوجرہ سمیت پنجاب کے میدانی علاقوں میں شدید دھند کا راج ہے، حادثات کے خوف سے شہریوں نے سڑکوں پر نکلنا چھوڑ دیا۔

گوجرہ میں شدید دھند کے باعث حد نگاہ انتہائی کم ہونے کے بعد موٹر وے ایم فور ہر قسم کی ٹریفک کیلئے بند کردی گئی، رحیم یارخان تا ملتان ایم فائیو موٹر وے دھند کی وجہ سے بند کردی گئی۔

اوچ شریف اور گردونواح میں کئی مقامات پر حدنگاہ صفر ہو گئی ہے، سکھرملتان موٹر وے ایم فائیو پرحد نگاہ دس سے بیس میٹر رہ گی جبکہ ٹبہ سلطان پور اور جلال پور پیروالہ میں دھند کے باعث حدنگاہ صفر رہ گئی اور ٹریفک کی روانی متاثر ہوئی۔

اس کے علاوہ مخدوم پور اور چشتیاں میں شدید دھند کے باعث حد نگاہ صفر ہو گئی، پاکپتن میں حد نگاہ بیس میٹر رہ گئی جس سے شہریوں کو آمد و رفت میں دشواری کا سامنا کرنا پڑا۔

اس حوالے سے ترجمان موٹروے پولیس کا کہنا ہے کہ قومی شاہراہ پرحد نگاہ انتہائی کم ہے، ترجمان نے مسافروں کو ہدایت کی ہے کہ شہری گاڑیوں میں فوگ لائٹس کا استعمال کریں اور دھند کے دوران غیر ضروری سفر سے گریز کریں اور موٹر وے پر سفر سے قبل موٹر وے ایپلی کیشن ایف ایم 95 ریڈیو اور ہیلپ لائن 130 سے مدد لیں۔

Comments

یہ بھی پڑھیں