کراچی: منگھوپیر میں دبئی سے 16 سال کے بعد شادی کے لیے آنے والا نوجوان کی پولیس کے ہاتھوں قتل ہونے کی فوٹیج سامنے آگئی۔
2 روز قبل منگھوپیر تھانے کی حدود میں چونگی موڑکے قریب دبئی سے 16 سال کے بعد شادی کے لیے آنے والا نوجوان شادی کے ایک ماہ بعد پولیس فائرنگ سے جاں بحق ہوگیا تھا، جس کی سی سی ٹی وی فوٹیج اے آر وائی نیو ز نے حاصل کرلی۔
رپورٹ کے مطابق سی سی ٹی وی فوٹیج فائرنگ کرنے کے بعد کی ہے، فوٹیج میں پولیس اور سادہ لباس افراد کو موٹر سائیکل اور موبائل پر دیکھا جاسکتا ہے۔
پولیس کا اس حوالے سے کہنا ہے کہ ویڈیو میں ملزمان کو فرار ہوتے ہوئے بھی دیکھا جاسکتا ہے، ملزمان کی مزید فوٹیج حاصل کرنے کی کوشش کر رہے ہیں۔
پولیس حکام نے اس واقعے کے بعد کہا تھا کہ اے وی ایل سی سینٹرل کی ٹیم نے ڈی ایس پی سینٹرل اے وی ایل سی کی سربراہی میں بغیرکسی اطلاع کے منگھوپیر تھانے کی حدود میں چونگی موڑکے قریب ناکا لگایا ہوا تھا اور نوجوانوں پر فائرنگ اے وی ایل سی سینٹرل کی ٹیم میں شامل ایک اسسٹنٹ سب انسپکٹر(اے ایس آئی ) نے کی ہے، جو کہ موقع سے فرار ہوگیا، جس کی گرفتاری کے لیے کوششیں کی جا رہی ہیں۔
