قطر میں کھیلے جا رہے فیفا ورلڈ کپ 2022 کے دونوں سیمی فائنل نئی گیند ’’ڈریم بال‘‘ سے کھیلے گئے جس نے ناکام ٹیموں کے خوابوں کو توڑ دیا۔
قطر میں کھیلے جا رہے فٹبال ورلڈ کپ 2022 کا رنگا رنگ میلہ اب صرف دو میچوں کے بعد اختتام پذیر ہو جائے گا۔ گزشتہ ماہ شروع ہونے والے دنیا کے سب سے مقبول کھیل فٹبال کے ورلڈ کپ میں اب تک 62 میچز کھیلے جا چکے ہیں۔
سیمی فائنل سے قبل گروپ، پری کوارٹر فائنل اور کوارٹر فائنل کے مجموعی طور پر 60 میچز جس فٹبال سے کھیلے گئے اس کو عربی میں ’’الرحلہ‘‘ کا نام دیا گیا تھا جس کا اردو میں معنی سفر نامے کے ہیں۔ یوں جب ورلڈ کپ کا یہ سفر 60 میچوں تک پہنچ کر صرف چار میچوں تک باقی رہ گیا اور آخری چار ٹیموں نے ورلڈ کپ جیتنے کا سہانا خواب آنکھوں میں سجا لیا تو پھر سیمی فائنل میں نئی گیند استعمال کرنے کا فیصلہ ہوا۔
ورلڈ کپ کے دونوں سیمی فائنل میں نئی گیند استعمال کی گئی جس کو عربی میں ’’الحلم‘‘ کا نام دیا گیا۔ اس کے اردو میں معنی خواب کے ہیں۔ یوں یہ نئی فٹ بال ’’ڈریم بال‘‘ کے نام سے دنیا میں جانی جا رہی ہے۔
ڈریم بال کا ڈیبیو ارجنٹائن اور کروشیا کے درمیان پہلے سیمی فائنل میں ہوا جس میں ارجنٹینا نے کروشیا کا فائنل کھیلنے کا خواب چکنا چور کیا اور دوسرے سیمی فائنل میں مراکش کا دفاعی چیمپئن فرانس سے شکست پاکر فائنل کھیلنے کا خواب ٹوٹ گیا۔
