The news is by your side.

پاکستان نے دہشت گردی سے متعلق جھوٹے بھارتی الزامات مسترد کر دیے

اسلام آباد: پاکستان نے دہشت گردی سے متعلق جھوٹے بھارتی الزامات کو مسترد کرتے ہوئے کہا ہے کہ بھارتی پروپیگنڈا مہم اور بے بنیاد الزامات بھارت کی مایوسی کی عکاس ہے۔

تفصیلات کے مطابق پاکستان نے دہشت گردی سے متعلق جھوٹے بھارتی الزامات کو مسترد کردیا، ترجمان دفتر خارجہ کا کہنا ہے کہ پاکستان بھارت کی جانب سے حالیہ دہشت گردی کے جھوٹے دعوؤں کو مسترد کرتا ہے۔

دفتر خارجہ کی جانب سے کہا گیا ہے کہ بھارت کی جانب سے علیحدہ مبینہ واقعات کو توڑ مروڑ کر پیش کیا جا رہا ہے، مبینہ واقعات کو بھارت نام نہاد دہشت گردی کی سازش کے طور پر پیش کر رہا ہے، بھارت پروپیگنڈے کے ذریعے منظم دہشت گردی کے بیانیے کو آگے بڑھا رہا ہے۔

ترجمان دفتر خارجہ کا کہنا ہے کہ بھارتی میڈیا پروپیگنڈا کر رہا ہے کہ پاکستانی واٹس ایپ نمبر سے پیغام روکا، بھارتی میڈیا جھوٹے دعوے کر رہا کہ کچھ ہتھیاروں کے ساتھ خالی کشتی قبضے میں لی گئی۔

دفتر خارجہ کے مطابق بھارتی میڈیا مبینہ واقعے کو نام نہاد ممبئی طرز حملے کی منصوبہ بندی سے جوڑنے کی کوشش کر رہا ہے، بھارتی الزامات پاکستان کو بدنام کرنے اور دہشت گردی کو جنم دینے کے بھارتی منصوبے کا تسلسل ہے۔

دفتر خارجہ کا مزید کہنا تھا کہ تمام بھارتی الزامات اور سازشوں کو یکسر مسترد کرتے ہیں، شرارتی بھارتی پروپیگنڈا مہم اور بے بنیاد الزامات بھارت کی مایوسی کی عکاس ہے۔

Comments

یہ بھی پڑھیں