اسلام آباد: پاکستانی دفتر خارجہ نے اقوام متحدہ کے انسانی حقوق کے ادارے کی جانب سے ملک میں آٹھ فروری کو ہونے والے انتخابات سے متعلق تشویش کو مسترد کردیا۔
تفصیلات کے مطابق اقوام متحدہ ہائی کمشنر برائے انسانی حقوق دفتر کے ریمارکس پر پاکستانی دفترخارجہ نے ردعمل دیتے ہوئے کہا کہ پاکستان ایک جامع جمہوری عمل کو فروغ دینے اور قانون کی حکمرانی برقرار رکھنے کے لیے پُرعزم ہے۔
ترجمان دفترخارجہ کا کہنا تھا کہ پاکستان انسانی حقوق اوربنیادی آزادیوں کےتحفظ کیلئےپوری طرح پُرعزم ہے، بنیادی آزادیوں کی ضمانت پاکستان کےقوانین اور آئین میں دی گئی ہیں۔
دفترخارجہ نے مزید کہا کہ قوانین کے مطابق آٹھ فروری کو انتخابات کے انعقاد کے لیے سکیورٹی منصوبے کو حتمی شکل دے دی گئی ہے۔
ان کا کہنا تھا کہ ہمارا عدالتی نظام منصفانہ ٹرائل اور مناسب قانونی عمل فراہم کرتا ہے، انتخابی عمل میں کسی بھی شکایت کی صورت میں داخلی قانونی راستے موجود ہیں۔
اقوام متحدہ نے پاکستان میں پارلیمانی انتخابات سے پہلے سیاسی جماعتوں اورامیدواروں کے خلاف تشدد پر تشویش کا اظہار کیا تھا۔
