اسلام آباد : سیکرٹری خارجہ ڈاکٹر اسد مجید خان قرض کے لئے چین پہنچ گئے، جہاں وہ چینی قیادت سے پاکستان کو درپیش مالی مشکلات پر بات چیت کریں گے۔
تفصیلات کے مطابق پاکستان کی مالی مشکلات پر بات چیت کیلئےسیکرٹری خارجہ ڈاکٹر اسد مجید خان چین پہنچ گئے۔
ذرائع نے بتایا کہ دورے کے دوران سیکرٹری خارجہ ڈاکٹر اسد مجید خان چینی وزیر خارجہ کن گینگ سے ملاقات کریں گے، ان کی کل چینی وزیرخارجہ سے ملاقات پہلے سے ہی طے ہے۔
پاکستان اور چین کے درمیان سیاسی ڈائیلاگ بھی ہوگا، جس میں ڈاکٹر اسد مجید خان اور نائب وزیر خارجہ سن وی ڈانگ مشترکہ صدارت کریں گے۔
گذشتہ روزوزیر خزانہ اسحاق ڈار نے کہا تھا کہ چین سے مزید 50 کروڑ ڈالر کے حصول کیلئے دستاویزی کارروائی مکمل کرلی گئی ہے ، فنڈز جلد اسٹیٹ بینک آف پاکستان کو جاری ہو جائیں گے، چینی بینک نے 1.3 ارب ڈالر کے رورل اوور کی منظوری دی تھی، پاکستان نے حال ہی میں یہ رقم چینی بینک کو واپس ادا کی تھی۔
اس ماہ کے شروع میں پاکستان کو انڈسٹریل اینڈ کمرشل بینک آف چائنا لمیٹڈ (ICBC) سے 500 ملین ڈالر موصول ہوئے تھے۔
