کراچی : برقعہ پوش افراد نے فائرنگ کرکے سابق پولیس اہلکار کو موت کے گھاٹ اتار دیا، مقتول کو گھر سے باہر بلاکر گولیاں ماری گئیں۔
تفصیلات ک مطابق کراچی کے علاقے لانڈھی اینٹی نائن محمد نگر کے قریب نامعلوم برقعہ پوش افراد نے گھر کے باہر بلا کر فائرنگ کرکے سابق اے ایس آئی آصف کو قتل کر دیا۔
پولیس حکام نے بتایا کہ جاں بحق کی شناخت آصف کے نام سے ہوئی ہے، مقتول پولیس کا سابق ملازم اور برطرف اہلکار تھا۔
حکام کا کہنا تھا کہ آصف کی بیٹی نے کورٹ میرج کی تھی جس بنا پر تنازع چل رہا تھا جبکہ مقتول آصف تھانہ شرافی گوٹھ میں قتل کرانے کے مقدمےمیں نامزد تھا۔
پولیس نے کہا کہ واقعہ ابتدائی طور پر خاندانی جھگڑے کا معلوم ہوتا ہے تاہم واقعے کے حوالے سے مزید تحقیقات جاری ہیں۔
حکام کے مطابق ابتدائی تفتیش سے پتہ چلا ہے کہ مقتول کو گھر سے باہر بلایا، مقتول اہلکار گھر سے باہر آیا تو برقعہ پوش افراد نے اسلحہ نکال کر ایک شخص کو دیا، جس نے گولیاں چلائیں اور موقع سے فرار ہوگئے۔
حکام کا کہنا تھا کہ وقوعہ سے سات خول ملے ہیں، مقتول کو ایک گولی لگی جو جان لیوا ثابت ہوئی۔
