The news is by your side.

Advertisement

پاکستان ہاکی کا ایک اور ستارہ ٹوٹ گیا، سابق اولمپیئن چل بسے

لاہور : پاکستان ہاکی کا ایک اور آفتاب غروب ہوگیا، سابق اولمپک گولڈ میڈلسٹ کھلاڑی اولمپیئن گلریز اختر جہان فانی سے کوچ کرگئے۔ گلریز اختر نے 1968میکسیکواولمپکس فائنل میں گول کرکے پاکستان کوفتح دلائی تھی ۔

پاکستان ہاکی فیڈریشن کے صدر بریگیڈیئررخالد سجاد کھوکھر اور سیکرٹری جنرل اولمپین آصف باجوہ کی جانب سے مرحوم کے لوحقین سے اظہار تعزیت کیا گیا ہے۔

تفصیلات کے مطابق پاکستان ہاکی کے تابناک ماضی کےہیرو 1968 میکسیکو اولمپکس گولڈ میڈلسٹ کھلاڑی اولمپین گلریز اختر 78 برس کی عمر میں خالق حقیقی سے جاملے۔

سال1968 میکسیکو اولمپکس فائینل میں لیفٹ ہاف کی پوزیشن پر کھیلتے ہوئے گول کرکے پاکستان کو فتح سے ہمکنار کرنے والے اولمپین گلریز اختر 1970 بینکاک ایشین گیمز میں بھی گولڈ میڈل حاصل کرنے والے کھلاڑی تھے۔

راولپنڈی میں پیدا ہونے والے قومی کھیل کے شاندار کھلاڑی نے آج لاہور میں اپنی زندگی کی آخری سانس لی۔اولمپین گلریز اختر مرحوم موجودہ ڈپٹی ڈائریکٹر اسپورٹس پنجاب محترمہ چاند پروین کے شوہر تھے۔

اولمپین گلریز اختر مرحوم کے انتقال پر صدر پاکستان ہاکی فیڈریشن برگیڈیئر رخالد سجاد کھوکھر، سیکرٹری جنرل پی ایچ ایف اولمپین آصف باجوہ نے گہرے دکھ اور افسوس کا اظہار کیا ہے۔

پاکستان ہاکی فیڈریشن کی جانب سے اپنے تعزیتی پیغام میں انہوں نے کہا کہ مرحوم گلریز اختر اولمپین نے اقوام عالم میں سبز ہلالی پرچم کو بلند کیا اور ملک و ملت کا نام روشن کیا۔ انکے انتقال پر پاکستان ہاکی فیڈریشن سوگوار ہے۔

Comments

یہ بھی پڑھیں