کراچی: ڈینگی سے ہونے والی ہلاکتوں کا سلسلہ تیز ہو گیا ہے، کراچی کے نجی اسپتال میں زیر علاج ڈینگی کے مزید 4 مریض دم توڑ گئے ہیں۔
تفصیلات کے مطابق کراچی میں ڈینگی سے مزید چار افراد جاں بحق ہو گئے ہیں، 82 سالہ سرفراز اور 35 سالہ افشاں کلفٹن کے نجی اسپتال میں زیر علاج تھے، جب کہ ناظم آباد میں واقع نجی اسپتال میں بھی ڈینگی کی زیر علاج 2 خواتین دم توڑ گئیں۔
کراچی میں رواں برس ڈینگی وائرس سے جاں بحق ہونے والوں کی تعداد 25 ہو گئی ہے۔
ترجمان انسداد ڈینگی پروگرام کا کہنا ہے کہ کراچی میں گزشتہ 24 گھنٹوں کے دوران 225 افراد ڈینگی سے متاثر ہوئے ہیں، جب کہ سندھ کے دیگر اضلاع میں 24 گھنٹوں میں 22 افراد ڈینگی سے متاثر ہوئے۔
یہ بھی پڑھیں: خیبر پختونخوا میں ڈینگی کے مثبت کیسز کی تعداد 6 ہزار سے بڑھ گئی
ترجمان کے مطابق ماہ اکتوبر میں سندھ بھر سے ڈینگی کے 5490 کیسز رپورٹ ہوئے، کراچی میں ماہ اکتوبر میں ڈینگی کے 5137 کیسز رپورٹ ہوئے، رواں سال کراچی سے ڈینگی کے 8181 کیسز رپورٹ ہوئے، رواں سال سندھ کے دیگر اضلاع سے 526 کیسز رپورٹ ہوئے، جب کہ رواں سال سندھ بھر میں ڈینگی کیسز کی تعداد 8707 ہے۔
خیبر پختون خوا میں بھی مختلف شہروں میں ڈینگی وائرس نے وبائی صورت اختیار کر لی ہے، ڈینگی رسپانس یونٹ کے مطابق آج ڈینگی کے 58 نئے کیسز سامنے آئے، صوبے میں ڈینگی کیسز کی تعداد 6408 ہو گئی ہے، پشاور میں ڈینگی کے 27 نئے کیسز رپورٹ ہوئے جس کے بعد شہر میں ڈینگی کیسز کی تعداد 2509 ہو گئی، جب کہ 6276 مریضوں کو علاج کے بعد اسپتالوں سے فارغ کیا جا چکا ہے۔
