امریکی صدر ڈونلڈ ٹرمپ کی پالیسز پر تنقید کرنے والے فرانسیسی سائنسدان کو امریکا میں داخلے کی اجازت نہ ملی۔
غیر ملکی ذرائع ابلاغ کے مطابق فرانس نے امریکی اقدام پر افسوس کا اظہار کرتے ہوئے کہا کہ اپنے دوستوں کے ساتھ بات چیت میں امریکی حکومت کی پالیسی کے بارے رائے رکھنا کسی کا ذاتی معاملہ ہے۔
فرانسیسی سائنسدان کو امریکا کے ہیوسٹن میں ایک سیمینار میں شرکت کرنا تھی، لیکن انکو ایئر پورٹ پہنچنے پر واپس جانے کی ہدایت کی گئی۔
امریکی اخبار نیویارک ٹائمز کے مطابق ہوم لینڈ سیکیورٹی کے محکمہ کا کہنا ہے کہ فرانسیسی سائنسدان کو واپس بھیجنے کے فیصلے کا ٹرمپ سے کوئی تعلق نہیں تھا۔ سائنسدان سے امریکی لیب سے متعلق ”خفیہ” ڈیٹا ملا، جس کی وجہ سے داخلے سے روکا گیا ہے۔
دوسری جانب ڈیموکریٹس نے محکمہ تعلیم بند کرنے کا ٹرمپ کا اقدام تباہ کن قرار دیتے ہوئے کہا فیصلے سے اساتذہ، طلبہ اور والدین متاثر ہوں گے۔
تفصیلات کے مطابق ڈیموکریٹس نے محکمہ تعلیم بند کرنے کا ٹرمپ کا اقدام تباہ کن قرار دے دیا، ڈیموکریٹ سینیٹر چک شومر نے کہا کہ ٹرمپ کے ہولناک فیصلے سے اساتذہ، طلبہ اور والدین متاثر ہوں گے۔
سینیٹر چک شومر کا کہنا تھا کہ عدالتوں کو ٹرمپ کے ظالمانہ اقدامات روکنے کیلئے قانون پر عمل کرنا چاہیئے۔
یاد رہے امریکا کے ٹرمپ نے ایک اور حیرت انگیز اقدام کرتے ہوئے امریکی محکمہ تعلیم کو بند کرنے کا اعلان کیا تھا۔ ٹرمپ کا کہنا تھا کہ امریکی اسکولز کا تعلیمی معیار انتہائی گر چکا ہے، ہائی اسکولز کے طلبا کو بنیادی ریاضی تک نہیں آتی۔
امریکا کی کولمبیا یونیورسٹی نے ٹرمپ کے آگے گھٹنے ٹیک دیئے
امریکی صدر نے تنقید کرتے ہوئے کہا کہ واشنگٹن میں محکمہ تعلیم کے پاس بڑی عمارتیں ہیں مگرتعلیم نہیں ہے، اسکولز کے معاملات کو ریاستیں خود دیکھیں گی، محکمہ تعلیم بند کرنے کے اقدام پر ریاستی گورنرز خوش ہیں۔
