اسلام آباد : فارن ایکسچینج ایکٹ کے تحت درج مقدمے میں چیئرمین پی ٹی آئی عمران خان نے حفاظتی ضمانت کے لیے اسلام آباد ہائی کورٹ سے رجوع کر لیا۔
تفصیلات کے مطابق تحریک انصاف کے چیئرمین عمران خان نے ممنوعہ فنڈنگ کیس کے مقدمے میں حفاظتی ضمانت کے لیے اسلام آباد ہائی کورٹ میں درخواست دائر کردی۔
درخواست میں کہا گیا ہے کہ ایف آئی اےنےفارن ایکسچینج ایکٹ کےتحت مقدمہ درج کررکھاہے، عدالت حفاظتی ضمانت منظورکرےتاکہ متعلقہ عدالت میں پیش ہو سکیں۔
عمران خان کی حفاظتی ضمانت کی درخواست پر رجسٹرار نے تین اعتراضات عائد کر دئیے، اسٹنٹ رجسٹرار اسد خان کی جانب سے اعتراضات لگائے گئے۔
رجسٹرار ہائیکورٹ نے اعتراض کیا ہے کہ عمران خان نے بائیو میٹرک نہیں کرائی اور درخواست کے ساتھ ایف آئی آر کی غیر مصدقہ نقل لگائی گئی ہے ، خصوصی عدالت میں جانے سے پہلے ہائی کورٹ کیسے آسکتے ہیں۔
گذشتہ روز ایف آئی اے نے عمران خان سمیت گیارہ افراد کے خلاف مقدمہ درج کیا تھا، مقدمے میں سردار اظہر طارق، سیف اللہ نیازی، سید یونس،عامرکیانی، طارق شیخ، اورطارق شفیع بھی نامزد ہیں۔
مقدمے میں کہا گیا کہ نیا پاکستان کےنام پر بینک اکاؤنٹ بنائے گئے، جس میں ابراج گروپ آف کمپنی سے اکیس لاکھ ڈالر آئے۔
تحریک انصاف نےعارف نقوی کا جھوٹااورجعلی بیان حلفی جمع کرایا جبکہ ووٹن کرکٹ کلب سے دومزید اکاؤنٹ سے رقم وصول ہوئی۔
خیال رہے راناثنااللہ کی وزارت داخلہ نے عمران خان کےخلاف مقدمہ درج کرنےکا حکم دیا تھا۔ حکومت عمران خان کو گرفتار کرنے یا گھر پر نظربند کرنے پر غور کر رہی ہے۔
