The news is by your side.

Advertisement

پشاور میں‌ دلیپ کمار کی غائبانہ نماز جنازہ ادا

پشاور: بالی ووڈ کے ٹریجڈی کنگ اور لیجنڈری اداکار دلیپ کمار کی غائبانہ نمازِ جنازہ پشاور میں ادا کردی گئی، جس میں اُن کے بھتجیے اور مداحوں نے شرکت کی۔

نمائندہ اے آر وائی نیوز کے مطابق لیجنڈ اداکار دلیپ کمار کی غائبانہ نماز جنازہ پشاور میں ان کے آبائی گھر کے قریب ادا کردی گئی، جس میں دلیپ کمار کے بھتیجے فواد اسحاق کے علاوہ مختلف شعبہ ہائے سے تعلق رکھنے والے افراد نے شرکت کی۔

اے آر وائی نیوز سے خصوصی گفتگو کرتے ہوئے دلیپ کمار کے بھتیجے فواد اسحاق نے بتایا کہ وہ اور ان کےخاندان کے دیگر لوگ چچا کے جنازے میں شرکت کے لئے جانے کے خواہش مند تھے مگر اجازت نہیں مل سکی۔

انہوں نے بتایا کہ  ان کے والد اور چچا دلیپ کمار بچپن میں محلہ خدا داد کے گھر میں رہے ہیں تقسیم ہند کے بعد ان کے چچا ممبئی منتقل ہوگئے، لیجنڈ اداکار کے گھر کو قومی ورثہ قرار دینے اور ان کی بحالی پر وزیراعظم عمران خان اور خیبرپختونخوا حکومت کا بھی شکریہ ادا کیا۔

دلیپ کمار کی یاد میں ان کے آبائی گھر کے سامنے شمع بھی روشن کی گئیں۔

مزید پڑھیں: صدر مملکت سمیت سیاسی رہنماؤں کا بھارتی اداکار دلیپ کمار کے انتقال پر اظہار افسوس

واضح رہے کہ دلیپ کمار 11 ستمبر 1922 کو پشاور کے قصہ خوانی کے محلہ خدا داد میں پیدا ہوئے ان کا اصل نام یوسف خان تھا لیکن ایک فلمی کردار کے بعد انہیں  دنیا میں دلیپ کمار کے نام سے شہرت ملی۔

تصویر بشکریہ : شیراز حسن

لیجنڈری اداکار کو طویل العمری کی وجہ سے صحت کے مسائل کا سامنا تھا جبکہ انہیں چند دنوں قبل طبعیت ناسازی کے بعد اسپتال میں داخل کرایا گیا، جہاں وہ آج 98 سال کی عمر میں دنیا کو الواداع کہہ کر سرحد کے دونوں طرف کے لوگوں داغِ مفارقت دے گئے۔

دوسری جانب ممبئی میں دلیپ کمار کو جوہو قبرستان میں آسودہ خاک کردیا گیا، انہیں قومی اعزاز کے ساتھ سپرد خاک کیا گیا، نماز جنازہ میں ساتھی اداکاروں، مداحوں، سیاسی رہنماؤں سمیت عوام بڑی تعداد میں شریک تھے۔

Comments

یہ بھی پڑھیں