پی ایس ایل 8 کے پہلے ایلیمینٹر میں پشاور زلمی نے لاہور قلندر کو شکست دے کر ٹورنامنٹ سے باہر کردیا کھیل کے کچھ لمحات نے پورے میچ کو الٹ پلٹ کر دیا۔
اے آر وائی نیوز کے مطابق ایچ بی ایل پاکستان سپر لیگ سیزن 8 کامیاب انعقاد کے ساتھ اپنے اختتام کی جانب گامزن ہے۔ گزشتہ روز کھیلے گئے پہلے ایلیمینٹر میں پشاور زلمی نے ایونٹ کی مضبوط ٹیم اسلام آباد یونائیٹڈ کو دلچسپ مقابلے کے بعد شکست دے کر ایونٹ سے ہی باہر کر دیا۔
اس مقابلے میں پشاور زلمی کی جانب سے دیے گئے 184 رنز کے ہدف کے تعاقب میں اسلام آباد یونائیٹڈ نے 14 اوورز میں ایک وکٹ کے نقصان پر 128 رنز بنا لیے تھے۔ کریز پر ایلکس ہیلز 57 اور صہیب مقصود 60 رنز بنا کر موجود تھے اور دونوں بلے بازوں نے جارحانہ انداز اپنایا ہوا تھا۔
اس مرحلے پر عامر جمال اور سلمان ارشاد کے اسپیل نے اسلام آباد یونائیٹڈ کے بلے بازوں پر قہر ڈھا کر ان کے میچ جیتنے کے ارمان پر پانی پھیر دیا۔ دونوں بالرز نے صرف رنز بنانے کی رفتار پر ہی قابو نہیں پایا بلکہ جارحانہ بلے بازوں کو پویلین بھی بھیجا۔
پہلے عامر جمال نے 60 رنز پر صہیب مقصود کو بولڈ کیا تو اگلے ہی اوور میں پی ایس ایل کے اسٹیج گروپ میں بولرز پر برسنے والے اعظم خان کو ہاتھ کھولنے سے قبل ہی سلمان ارشاد نے قابو کرلیا اور 2 رنز کے انفرادی اسکور پر ان کی وکٹ اڑا دی۔
اس سے اگلے اوور میں عامر جمال نے ایلکس ہیلز کو آؤٹ کیا تو سلمان نے تن تنہا میچ جتوانے کی صلاحیت رکھنے والے کولن منرو کو چار رنز پر پویلین واپس بھیج دیا۔
میچ میں زلمی کی بولنگ کی جاندار نہیں رہی بلکہ پھرتی اور عقل کے شاندار استعمال نے بھی ان کی جیت کی راہ ہموار کی۔ یونائیٹڈ کے کپتان شاداب خان کو کریز پر جوائن کرنے والے فہیم اشرف کو عامر جمال نے رن آؤٹ کرکے امیدوں کے چراغ مکمل بجھا دیے۔ شاداب خان دوسرے اینڈ پر اپنی ٹیم کے بلے بازوں کو پویلین سے آتا اور واپس جاتا دیکھتے رہے۔
شاندار بولنگ کے ساتھ چابکدستی سے فیلڈنگ، یہ وہ لمحات تھے جنہوں نے میچ کا رخ پشاور زلمی کی طرف پلٹ دیا۔
