وزیراعلیٰ خیبرپختونخوا علی امین گنڈاپور کی گمشدگی اور کے پی ہاؤس واقعے کے خلاف خیبر پختونخوا اسمبلی قرارداد پیش کی گئی۔
تفصیلات کے مطابق خیبر پختونخوا اسمبلی کا اجلاس ہوا جس میں قرار پیش کی گئی، آفتاب عالم نے کہا کہ وزیراعلیٰ کی گمشدگی پر انتظامی سطح پر خط و کتابت کا نہ ہونا چیف سیکریٹری کی ناکامی ہے، وفاقی وزیر داخلہ و گورنر خیبر پختونخوا کو چاہیے تھا صوبائی حکومت کو آگاہ کریں۔
قرارداد میں کہا گیا کہ صوبے میں آئینی آرڈر کو بحال کرنا ضروری ہے، اسپیکر کے پی اسمبلی تمام اداروں سے رپورٹ طلب کریں، اسپیکر تمام قانونی اقدامات اٹھاکر ایوان کو اعتماد میں لیں،
خیبر پختونخوا اسمبلی کے اسپیکر نے چیف سیکریٹری اور آئی جی کے پی کو کل طلب کرلیا ہے، اسپیکر نے وزیراعلیٰ کے پرنسپل سیکریٹری کو بھی طلب کرلیا ہے۔
اسپیکر کا کہنا تھا کہ حکام کل پیش ہوکر بتائیں وزیراعلیٰ سے متعلق کیا اقدامات کیے گئے ہیں، کے پی ہاؤس اسلام آباد میں کیا ہوا اس متعلق بھی آگاہ کیا جائے۔
