شیفیلڈ : برطانیہ میں ڈاکوؤں نے زیورات چھیننے کیلئے شہری کو بری طرح تشدد کا نشانہ بنا ڈالا، ہزاروں مالیت کا زیور لے کر فرار ہوگئے۔
تفصیلات کے مطابق دنیا بھر میں چوری ڈکیتی کے واقعات بہت عام ہوتے جارہے ہیں، برطانیہ میں ایک ڈکیتی کی واردات کے دوران ملزمان نے شہری کی درگت بنا ڈالی۔
واقعے کی ویڈیو سوشل میڈیا پر وائرل ہوگئی جس میں دیکھا جاسکتا ہے کہ برطانوی شہر شیفیلڈ کی سڑک کے کنارے ایک شخص سے کچھ ڈاکوؤں کے ایک گروہ نے زیورات کا پیکٹ چھیننے کی کوشش کی جس پر اس نے مزاحمت کی۔
پچاس ہزار پونڈ مالیت کے زیورات کا ڈبہ چھیننے میں ناکامی پر ملزمان نے اسے زمین پر گرا کر شدید تشدد کا نشانہ بنایا اور لاتوں گھونسوں کی بارش کردی اس دوران راہ گیر بھی جمع ہوگئے۔
سماجی رابطے کی ویب سائٹ انسٹا گرام پر پوسٹ کی گئی ایک ویڈیو میں لوگوں کی بڑی تعداد کو شیفیلڈ کی ایک گلی کے کنارے موجود دیکھا جاسکتا ہے ویڈیو میں ایک عورت کو بار بار چیختے ہوئے بھی سنا جاسکتا ہے جو کہہ رہی ہے کہ اسے روکو! تم کیا کر رہے ہو؟ تاہم ملزمان اس شخص سے زیورات کا پیکٹ چھین کر فرار ہونے میں کامیاب ہوگئے۔
