اسلام آباد: وزیر مملکت برائے توانائی مصدق ملک نے کہا ہے کہ مارچ کے مہینے میں روس کے ساتھ تیل کا معاہدہ طے پائے گا، اگلی سردیوں کے لیے بھی روس سے ایل این جی کا معاہدہ کیا جائے گا۔
تفصیلات کے مطابق اسلام آباد میں میڈیا سے بات کرتے ہوئے ڈاکٹر مصدق ملک نے روسی تیل کے حوالے سے کہا کہ مارچ میں تمام کمرشل ڈیلز پر دستخط ہو جائیں گے، اور پاکستان میں سستا تیل آنا شروع ہو جائے گا۔
انھوں نے کہا کہ مستقبل میں اگلی سردیوں کے لیے بھی روس سے گیس کے لیے طویل المدتی معاہدے کریں گے۔
مصدق ملک کا کہنا تھا کہ روس نے اپنی 2 کمپنیوں کو پاکستان سے معاہدہ کرنے کا کہا ہے، انھوں نے یہ بھی کہا کہ ایس ایس جی سی اور پی ایس او کے ذریعے کم سے کم 20 ہزار ٹن ایل پی جی منگوائی گئی ہے۔
یاد رہے کہ وزیر مملکت برائے پیٹرولیم نے ہفتے کے روز بھی کہا تھا کہ مارچ میں روس سے معاہدہ ہو جائے گا، جس کے بعد جلد از جلد خام تیل کی درآمد شروع ہو جائے گی، انھوں نے کہا کہ ہم نے روس کے ساتھ تمام بنیادی چیزیں طے کر لی ہیں، روس کے ساتھ بینیفشل ٹرم پر معاہدہ ہوگا، اور روس پاکستان کو دوسرے ملکوں سے زیادہ رعایت پر تیل دے گا۔
