اسلام آباد: تیل اور گیس کی تلاش کرنے والی پاکستان کی معروف کمپنیوں نے ایک اہم مفاہمت کی یادداشت پر دستخط کیے ہیں۔
تفصیلات کے مطابق تیل اور گیس کی تلاش کرنے والی پاکستان کی معروف کمپنیوں نے ملک کے اندر اور باہر ماحول دوست گیسوں کی دریافت کے لیے مفاہمت کی ایک یادداشت پر دستخط کیے ہیں۔
مفاہمت کی یادداشت پر آئل اینڈ گیس ڈویلپمنٹ کمپنی لمیٹڈ کے منیجنگ ڈائریکٹر، پاک عرب ریفائنری لمیٹڈ، پاکستان پٹرولیم لمیٹڈ، ماڑی پٹرولیم کمپنی لمیٹڈ اور گورنمنٹ ہولڈنگز پرائیویٹ لمیٹڈ کے نمائندوں نے اپنی کمپنیوں کی طرف سے دستخط کیے۔
اس تعاون کا مقصد پائیدار مستقبل کے لیے کمپنیوں کے وسائل اور تجربات سے فائدہ اٹھانا ہے، پہلے مرحلے میں منصوبے کے قابل عمل ہونے پر کام شروع کیا جائے گا۔
مفاہمت کی یادداشت کے تحت کمپنیاں ماحول دوست توانائی کے لیے مشترکہ تعاون اور منصوبوں کا جائزہ لیں گی، کمپنیاں ہائیڈروجن کی تلاش کے منصوبوں کے لیے وسائل کی فراہمی کے لیے مشترکہ فنڈ بھی قائم کریں گی۔
