ویرات کوہلی اور روہت شرما کے حوالے سے سابق بھارتی کرکٹر گوتم گمبھیر نے کہا ہے کہ ان جیسے کھلاڑی آنے والے ایک روزہ کرکٹ ورلڈ کپ میں اہم کردار ادا کریں گے۔
سابق بھارتی اوپنر بیٹر گوتم گمبھیر نے ون ڈے ورلڈ کپ کے لیے بھارتی ٹیم کے انتخاب کے بارے میں بات کرتے ہوئے کہا کہ بھارتی کرکٹ بورڈ کو ایسے کھلاڑیوں کی شناخت کرنے کی ضرورت ہے جو بے خوف رویے کے ساتھ پچ پر کھیل سکیں۔
واضح رہے کہ گوتم گمبھیر 2011 ورلڈ کپ جیتنے والی ٹیم کا حصہ تھے، انھوں نے اپنے تجربے کے پیش نظر کہا کہ کھلاڑیوں کے رویے تبدیل ہو گئے ہیں، جس کی وجہ سے کرکٹ کھیل متاثر ہوا ہے، اس لیے ایسے کھلاڑی شناخت کرنے ہوں گے جو رویوں کے حوالے سے مخصوص سانچے میں ڈھل سکیں۔
گمبھیر نے کہا کہ ورلڈ کپ کے لیے ضروری ہے کہ صحیح کھلاڑیوں کو شناخت کیا جائے، تاکہ درست کمبنیشن بنے اور یہ نہ ہو کہ کھلاڑیوں کو کسی خاص طریقے سے کھیلنے پر مجبور کیا جائے۔
سابق انڈین کرکٹر نے کہا کہ میرے خیال میں ویرات کوہلی، روہت شرما اور وہ تمام کھلاڑی جو وکٹ پر رہ سکتے ہیں اور اسپن کو واقعی اچھی طرح سے کھیل سکتے ہیں، آنے والے ورلڈ کپ میں ایک بڑا کردار ادا کریں گے۔
گمبھیر نے رواں برس ون ڈے ورلڈ کپ کو مدنظر رکھتے ہوئے زیادہ سے زیادہ ون ڈے کرکٹ کھیلنے پر بھی زور دیا، انھوں ںے کہا کہ اگر تین سے زیادہ فارمیٹ کھیلنے والے کھلاڑی وقفہ لینا چاہتے ہیں تو وہ ٹی ٹوئنٹی کرکٹ سے وقفہ لیں، ون ڈے فارمیٹ سے بالکل بھی نہیں۔
