اسرائیل اور حماس کے درمیان غزہ کی پٹی میں انسانی بنیادوں پر جنگ بندی میں توسیع کا معاہدہ طے پا گیا۔
تفصیلات کے مطابق غزہ میں اسرائیل کی وحشیانہ کارروائیوں کے بعد حماس اور اسرائیل کے درمیان 4 روزہ جنگ بندی ہوئی تھی جس میں 2 روز کی مزید توسیع کردی گئی ہے۔
اسرائیل اور حماس کے بیچ ثالثی کرنے والے قطری حکام کی جانب سے خبر دی گئی ہے کہ جنگ بندی معاہدے میں مزید دو دنوں کی توسیع ہوئی ہے۔
مصری حکام کا کہنا ہے کہ 2 دن کی توسیع کے دوران مزید 20 اسرائیلیوں اور 60 فلسطینیوں کو رہا کیا جائے گا۔ اس حوالے سے خبریں سامنے آنے کے بعد حماس نے بھی جنگ بندی میں توسیع کے معاہدے کی تصدیق کردی ہے۔
اس سے قبل مصر کی اسٹیٹ انفارمیشن سروس (SIS) کی سربراہ دیا راشوان نے کہا تھا کہ مصر اور قطر غزہ کے ساتھ اسرائیل کی جنگ بندی میں دو دن کی توسیع کے معاہدے تک پہنچنے کے قریب ہیں۔
اسرائیل اور حماس کے درمیان 4 روزہ جنگ بندی کا آخری دن تھا۔ اقوام متحدہ سمیت دنیا بھر سے جنگ بندی معاہدے میں توسیع اور مستقل جنگ بندی پر زور دیا جارہا ہے۔
