معروف بھارتی اداکارہ جینیلیا ڈی سوزا نے 10 سال بعد فلم انڈسٹری میں واپسی کو خوشگوار تجربہ قرار دیا ہے، ان کی حال ہی میں نئی فلم وید ریلیز ہوئی ہے جسے خاصی پذیرائی ملی ہے۔
سنہ 2003 میں فلم تجھے میری قسم سے اپنے فلمی کیریئر کا آغاز کرنے والی جینیلیا ڈی سوزا نے ابتدا میں ماڈلنگ کی تھی اور پھر تامل فلموں میں اداکاری کے جوہر دکھائے تھے۔
سنہ 2012 میں انہوں نے معروف مزاحیہ اداکار رتیش دیش مکھ سے شادی کے بعد فلموں سے غیر اعلانیہ کنارہ کشی اختیار کرلی تھی تاہم اس دوران وہ مختلف تشہیری سرگرمیوں میں مصروف رہیں۔
اب 10 سال بعد فلم وید کے ذریعے ان کی فلموں میں واپسی ہوئی ہے، فلم کو رتیش دیش مکھ نے ڈائریکٹ کیا ہے جبکہ فلم کا ایک مرکزی کردار بھی وہی ادا کر رہے ہیں۔
اداکارہ نے اس میں ایک ہاؤس وائف کا نہایت سنجیدہ کردار نبھایا ہے۔
ایک انٹرویو میں اپنے فلمی سفر کے بارے میں گفتگو کرتے ہوئے جینیلیا کا کہنا تھا کہ وہ خود سے فلموں کی طرف نہیں آئیں اور نہ انہوں نے اسے بطور کیریئر چنا، بس لوگوں نے انہیں دیکھا اور فلموں کی آفرز کی جس کے بعد وہ آگے بڑھتی گئیں۔
اداکارہ کا یہ بھی کہنا تھا کہ کوئی خاص قسم کے کردار ان کی ترجیح نہیں البتہ وہ مختلف کام کرنا چاہتی ہیں۔
انہوں نے یہ بھی کہا کہ وہ خود سے زیادہ توقعات وابستہ کیے ہوئے نہیں ہیں، تاہم جو بھی کام کرتی ہیں اسے بھرپور محنت سے کرتی ہیں۔
دسمبر 2022 میں ریلیز ہونے والی ان کی فلم وید کو ان کے مداحوں کی جانب سے مثبت ردعمل موصول ہوا ہے، 18 لاکھ ڈالر کے بجٹ سے بننے والی فلم نے سینما گھروں میں 94 لاکھ ڈالرز کی کمائی کی ہے۔
