برلن: جرمن حکومت نے بھارت کو کوروناوائرس کی ‘ریڈ لسٹ’ سے نکالنے اور سفری پابندی کے خاتمے کا اعلان کردیا۔
غیرملکی خبررساں ادارے کی رپورٹ کے مطابق جرمنی نے بھارت سمیت دیگر چند ممالک کو بھی کورونا وائرس کی ریڈ لسٹ والے ممالک سے نکال کر انہیں سفری نرمی فراہم کرنے کا اعلان کیا ہے۔
رپورٹ میں بتایا گیا ہے کہ بھارتی شہری پروازوں کے ذریعے جرمنی آسکیں گے۔ جرمن حکومت کی ریڈ لسٹ سے کل بھارت، نیپال، روس، پرتگال اور برطانیہ نکل جائیں گے۔
خیال رہے کہ کوروناوائرس کی بگڑتی صورت حال کے باعث جرمنی نے بھارت پر فضائی پابندی عائد کی تھی لیکن اس دوران قرنطینہ پالیسی کے تحت جرمنی شہریوں کو بھارت سے اپنے ملک واپسی کی اجازت تھی۔
سفری پابندی میں توسیع، پروازیں کب سے بحال ہوں گی؟
دوسری جانب بھارت نے بین الاقوامی پروازوں پر عائد پابندی میں 31 جولائی تک توسیع کررکھی ہے۔ 31 جولائی تک بین الاقوامی پروازیں بھارت آسکیں گی اور نہ ہی اڑان بھرنے دیا جائے گا ہاں البتہ خصوصی فلائٹس بحال رہیں گی۔
تاہم مال بردار طیارے اور بھارتی سول ایوی ایشن کی جانب سے منظور شدہ پروازوں کو اس حکم سے مستثنیٰ قرار دیا گیا ہے۔ اسی طرح اندرون ملک فلائٹس بھی آپریٹ ہوتی رہیں گی۔
