راولپنڈی: وزیراعظم شہباز شریف کی ہدایات پر عمل کرتے ہوئے پولیس نے جی ایچ کیو پر حملے کرنے والے ملزمان کی گرفتاریاں شروع کردیں ہیں۔
ذرائع کے مطابق راولپنڈی پولیس نے جنرل ہیڈ کوارٹر (جی ایچ کیو) میں توڑ پھوڑ میں ملوث ایک ملزم کو گرفتار کرلیا ہے جس کی شناخت ادریس کے نام سے ہوئی ہے ملزم ضلعی سرکاری ادارے کا ملازم بتایا جاتا ہے، ملزم کو سوشل میڈیا ویڈیو کے ذریعے شناخت کیا گیا۔
واضح رہے کہ وزیراعظم نے جی ایچ کیو میں توڑ پھوڑ کرنے والے شرپسند عناصر کو 72 گھنٹوں میں گرفتار کرنے کا حکم دیا تھا،گرفتاریوں کیلئے راولپنڈی پولیس کی خصوصی ٹیم تشکیل دی گئی ہے۔
جی ایچ کیوپرتوڑپھوڑکا مقدمہ تھانہ آر اے بازار میں درج کیا گیا ہے۔
یہ بھی پڑھیں: لاہور کینٹ میں فوجی دفاتر کو ملک دشمنوں کی طرح نشانہ بنایا گیا
ادھر ٹوبہ ٹیک سنگھ میں پولیس نے چھاپہ مار کر سابق رکن پنجاب اسمبلی جاوید اکرم کو گرفتار کرلیا ہے۔
اہل خانہ نے سابق ایم پی اے کی گرفتاری کی تصدیق کرتے ہوئے بتایا کہ جاوید اکرم کے بیٹے اور بہو کو بھی لاہور ہائی کورٹ سے گرفتار کیا جاچکا ہے۔
پولیس کے مطابق گرفتار افراد آج کمانڈر ہاؤس میں جلاؤ گھیراؤ میں ملوث ہیں۔
