کراچی : وفاقی وزیر برائے ہوا بازی غلام سرور خان نے کہا ہے کہ وزیراعظم کے واشنگٹن کے دورے کے بعد امریکا کیلئے براہ راست پروازیں شروع ہو جائیں گی، اے ایس ایف کے جوانوں کو جدید ہتھیاروں اور گاڑیوں سے لیس کیا جارہا ہے۔
یہ بات انہوں نے کراچی میں میڈیا سے گفتگو کرتے ہوئے کہی، انہوں نے کہا کہ ملک بھر کے تمام ایئرپورٹس کو دور جدید کے تقاضوں سے ہم آہنگ کیا جارہا ہے۔ ایئرپورٹس پر سیکیورٹی کے حوالے سے جدید ترین سرچنگ سسٹم بھی نصب کئے جائیں گے۔
وفاقی وزیر کا کہنا تھا کہ تمام بڑے ایئرپورٹس پر اے ایس ایف کے جوانوں کو جدید ہتھیاروں اور گاڑیوں سے لیس کیا جارہا ہے جس کی مدد سے اسٹیٹ آف آرٹ سیکیورٹی سسٹم کو فعال کرنے میں مزید مدد ملے گی۔
ان کا مزید کہنا تھا کہ محفوظ ہوائی سفر کیلئے ایئرپورٹس کی سیکیورٹی پر مبنی جدید ہتھیاروں اور آلات کا حصول جدید تقاضوں کیلئے انتہائی ضروری ہے۔
یاد رہے کہ امریکا کی ٹرانسپورٹ سیکیورٹی اتھارٹی نے اسلام آباد کے بعد کراچی ایئرپورٹ پر مسافروں کے سامان کی اسکریننگ اور دیگر سیکیورٹی آلات کی جانچ کی، جانچ کا مقصد پاکستان سے امریکا تک براہ راست پروازوں کے لیےسیکیورٹی امور کا جائزہ لینا تھا۔
اس موقع پر اے ایس ایف اہلکاروں نے امریکی وفد کو مسافروں کی اسکریننگ کے حوالے سے بھی بریفنگ دی۔ امریکی سیکیورٹی اتھارٹی نے کراچی ایئرپورٹ پر سیکیورٹی کے حوالے سے نصب آلات کا جائزہ بھی لیا،امریکی وفد نے ایف آئی اے امیگریشن کے کاونٹر کا بھی دورہ کیا۔
