The news is by your side.

Advertisement

سعودی عرب میں یتیم بچوں اور معمر افراد میں تحائف تقسیم

ریاض: سعودی عرب میں ماہ صیام کے موقع پر مخیر مرد و خواتین شہریوں کی جانب سے مستحق افراد میں تحائف تقسیم کیے گئے۔

عرب میڈیا کے مطابق آئیے ہم سے ملیے کے عنوان سے شہریوں میں خوشیاں بانٹنے کا ایک منفرد پروگرام شروع کیا گیا جس میں ایک سو خواتین اور مرد شہریوں نے حصہ لیا اور مستحق افراد میں تحائف تقسیم کیے۔

اس فلاحی سرگرمی کی ایک ذمہ دار اور سیاحتی گائیڈ ابرار باشویعر نے عرب ٹی وی سے گفتگو کرتے ہوئے کہا کہ ہم نے اپنے گروپ کو مختلف ٹیموں میں تقسیم کیا ہے۔

ابرار باشویعر کے مطابق ٹیم میں ہر ایک کا اپنا اپنا مخصوص کام ہے، ایک ٹیم رابطہ کرتی ہے دوسری تحائف کی پیکنگ کرتی اور تیسری ٹیم یتیم بچوں اور عمر رسیدہ افراد تک یہ تحائف پہنچاتی ہے۔

انہوں نے کہا کہ ہمارا مقصد مملکت کے اسپتالوں میں زیر علاج عمر رسیدہ افراد اور یتیم بچوں میں خوشیاں بانٹنا ہے، اس حوالے سے ہماری ٹیمیں مختلف اسپتالوں کے دورے کرتی ہیں۔

ابرار باشویعر نے کہا کہ تحائف کی تقسیم ہمارے پیارے نبی حضرت محمد صلی اللہ علیہ وسلم کی سنت ہے، آپ نے فرمایا تھا ’سلام کو عام کرو اور تحائف دیا کرو‘، اسی مشن کے تحت ہم نے ماہ صیام میں جدہ اور مدینہ منورہ میں 300 تحائف تقسیم کیے۔

Comments

comments

یہ بھی پڑھیں