ویسے تو دنیا بھر میں روزانہ سیکڑوں یا ہزاروں کی تعداد میں بچے پیدا ہوتے ہیں، جن میں سے کئی بچے پیدائشی بیماریوں کا شکار ہوتے ہیں۔
تاہم چند بچے ایسی حالت میں بھی پیدا ہوتے ہیں، جن کا اس دنیا میں کوئی علاج ہی نہیں ہوتا ان کی جسامت میں قدرتی کمی بیشی مرتے دم تک ان کے ساتھ رہتی ہے۔
برطانیہ کی رہائشی ٹیسا کا شمار بھی ایسے ہی بچوں میں ہوتا ہے لیکن اس کے والدین کی دن رات کی محنت اور بچی کی خود اعتمادی نے دیکھنے والوں کو خوشگوار حیرت میں مبتلا کردیا۔
یہ نوجوان لڑکی ٹیسا جسے "وولڈیمورٹ” کے نام سے جانا جاتا ہے کیونکہ وہ بغیر ناک کے پیدا ہوئی تھی اپنی منفرد شکل اور خوش نزاجی کی وجہ سے نمایاں ہے۔
برائٹ سائیڈ کی رپورٹ کے مطابق ٹیسا ایک غیر معمولی بیماری یا کمی کے ساتھ پیدا ہوئی تھی جسے پیدائشی ارہینیا کہا جاتا ہے، جس کا مطلب ہے کہ اس کی ناک نہیں ہے۔ ٹیسا کو اپنی زندگی کے آغاز سے ہی مخصوص چیلنجز کا سامنا رہا تاہم ان رکاوٹوں اور پریشانی کے باوجود ٹیسا بے مثال جوش و جذبے کے ساتھ زندگی گزار رہی ہے۔
ارہینیا کی علامت اس وقت ظاہر ہوتی ہے جب مادر رحم میں ناک کی نشوونما نہیں ہوتی جس کی وجہ سے چہرے پر ناک نہیں بن پاتی، اس کے ساتھ ہی دماغ کا وہ حصہ جو خوشبو اور بدبو کو پہچاننے کا ذریعہ ہے وہ بھی کارآمد نہیں ہوتا۔
ٹیسا کے والدین گرین اور ناتھن ایونز نے اس کی پیدائش سے کچھ ماہ قبل ہونے والی الٹرا ساؤنڈ رپورٹ میں سب کچھ ظاہر ہونے کے باوجود اس صدمے کو برداشت کیا اور اس عزم کا اظہار کیا کہ وہ اس بچی کی مکمل دیکھ بھال اور پرورش کریں گے۔
ٹیسا نے ناک کے بغیر اپنی زندگی کو ڈھال لیا ہے وہ اپنے منہ سے سانس لینے پر انحصار کرتی ہے اور سونگھنے کی حس کی کمی کے باوجود بھی زندگی کو بھرپور طریقے سے گزار رہی ہے۔
اس کے والدین کا کہنا تھا کہ ٹیسا نے سب کو غلط ثابت کیا ہے، اس نے سب کی توقعات سے بڑھ کر خود کو اچھا دکھایا، اس نے یہ بھی ثابت کیا کہ وہ ایک پرفیکٹ لڑکی ہے جب بھی وہ کسی سے ملتی ہے تو اس کا موڈ خوشگوار ہوتا ہے اور وہ عام بچوں کی طرح ہنستی کھیلتی ہے۔
