گوجرانوالہ : شادی سے انکار پر لڑکی کو قتل کردیا گیا ، ملزم نوید نے ساتھی کیساتھ ملکر رکشہ روک کر فائرنگ کی۔
تفصیلات کے مطابق گوجرانوالہ میں ڈھاریوال روڈ پر ملزم نے رشتہ سے انکار پر فائرنگ کرکے لڑکی کو قتل کر دیا۔
پولیس نے بتایا کہ ملزم نوید نے ساتھی کیساتھ ملکر رکشہ روک کر فائرنگ کی، مقتولہ کے والد نے الزام لگایا کہ ملزم بیٹی سے زبردستی شادی کرنا چاہتا تھا انکار پر فائرنگ کی۔
پولیس کے مطابق فائرنگ کے بعد ملزمان فرار ہوگئے تاہم لڑکی کے والد کی مدعیت میں مقدمہ درج کرلیا ہے اور ملزمان کی گرفتار ی کیلئے چھاپے مارے جا رہے ہیں۔
یاد رہے رواں سال فروری میں لاہور کے علاقے گلشن راوی میں رشتے سے انکار پر نوجوان آپے سے باہر ہوگیا تھا اور تیش مین آکر لڑکی کو قتل کردیا تھا جبکہ لڑکے نے لڑکی کو چھریاں مارنے کے بعد اپنے گلے پر چھری پھیرلی تھی۔
پولیس نے بتایا تھا کہ احسان نامی نوجوان ایک بیوٹی پارلر چلانے والی لڑکی سے شادی کرنا چاہتا تھا، لڑکی کی والدہ نے رشتہ دینے سے انکار کردیا تھا۔
