بھارت میں تلنگانہ کے ضلع آصف آباد کے کورٹلہ منڈل میں ایک دلخراش واقعہ رونما ہوا، دسویں جماعت کی طالبہ نے موبائل فون نہ ملنے پر زندگی کا خاتمہ کرلیا۔
بھارتی میڈیا رپورٹس کے مطابق پولیس کا اس حوالے سے کہنا ہے کہ کورٹلہ کی رہنے والی 16 سالہ اسپورتی نامی طالبہ نے اپنی ماں سے موبائل فون طلب کیا تا کہ وہ تعلیمی مواد ڈاؤن لوڈ کر سکے۔
رپورٹس کے مطابق ماں نے فون دینے سے انکار کیا تو طالبہ شدید مایوسی کا شکار ہوگئی، ذہنی دباؤ میں آ کر اس نے انتہائی قدم اٹھایا اور خودکشی کرلی۔
پولیس کے مطابق معاملے کی مزید تحقیقات شروع کردی گئی ہیں تاکہ مزید تفصیلات سامنے آ سکیں۔
اس سے قبل بھی گزشتہ ماہ بھارت میں مغربی بنگال کے ایک کھیت سے لاپتہ آٹھویں جماعت کی طالبہ کی لاش برآمد ہوئی تھی، بچی کو زیادتی کے بعد قتل کئے جانے کا امکان ظاہر کیا گیا تھا۔
پولیس کا اس حوالے سے کہنا تھا کہ آٹھویں جماعت کی طالبہ 9 جنوری سے لاپتہ تھی۔ بچی کے اہل خانہ نے تین دن بعد 12 جنوری کو گمشدگی کا مقدمہ درج کرایا۔
پولیس کے مطابق لڑکی کی لاش برآمد کرلی گئی ہے، متاثرہ کے والدین کی شکایت کی بنیاد پر معاملے کی تحقیقات کا آغاز کردیا گیا ہے، جبکہ لاش کو پوسٹ مارٹم کے لئے بھیج دیا گیا ہے۔
ذرائع نے بتایا کہ متاثرہ کے والدین نے جب سے گمشدگی کی رپورٹ درج کرائی تھی، پولیس نے اس کی تلاش شروع کردی تھی۔ گزشتہ روز شام کو اطلاع ملی کے متاثرہ لڑکی کی برہنہ لاش گھر کے قریب کھیت میں موجود ہے۔
متاثرہ کے والدین نے دعویٰ کیا کہ ان کی بیٹی 9 جنوری کی دوپہر کو کچھ مقامی نوجوانوں کے بلانے کے بعد گھر سے باہر گئی تھی۔ وہ تب سے لاپتہ تھی۔
کزن کی شادی میں ڈانس کرتے ہوئے خاتون کی موت
لڑکی کے گھر کے ایک فرد کا کہنا تھا کہ ہمیں شبہ ہے کہ پہلے اس کے ساتھ اجتماعی عصمت دری کی گئی اور پھر اس کی لاش کو دفن کر دیا گیا۔ ہم مجرموں کا جلد سے جلد سراغ لگانے اور سخت سزا دینے کا مطالبہ کرتے ہیں۔
