کراچی: سونے کی فی تولہ قیمت 600 روپے کمی سے ایلک لاکھ 4 ہزار 600 روپے ہوگئی، 10گرام سونے کی قیمت 514 روپے کمی کے بعد 89678 روپے ہوگئی ہے۔
تفصیلات کے مطابق بین الاقوامی مارکیٹ میں ٹریڈنگ کے دوران سونے کی قیمت 8 ڈالر فی اونس کمی کے بعد 1774 ڈالر ہوگئی، عالمی مارکیٹ میں نمایاں کمی کے بعد پاکستان میں سونے کی فی تولہ قیمت میں نمایاں کمی ریکارڈ کی گئی۔
آل پاکستان جیولرز ایسوسی ایشن کے چیئرمین محمد ارشد کے مطابق سونے کی فی تولہ اور دس گرام قیمتوں میں بالترتیب 600 روپے اور 514 روپے کمی ہوئی۔حالیہ کمی کے بعد پاکستان میں سونے کی فی تولہ قیمت ایک لاکھ 4 ہزار 600 روپے اور دس گرام کی قیمت 89 ہزار 678 روپے ہوگئی۔
دوسری جانب انٹربینک میں ڈالر کی قدر 1.16 روپے کم ہو کر 166.88 روپے ہوگئی جبکہ اوپن مارکیٹ میں ڈالر کی قدر 80 پیسے کم ہو کر 167.40 روپے ہوگئی۔
واضح رہے کہ مالی سال 2019-2020 کے دوران سونے کی فی تولہ قیمت میں 26 ہزار روپے اضافہ ہوا، گزشتہ برس جون کی تیس تاریخ کو پاکستان میں سونے کی فی تولہ قیمت 78 ہزار 500 روپے تھی۔
