کراچی : پاکستان میں سونے کی قیمت میں آج پھر اضافہ ہوا اور سونا 3 لاکھ 4 ہزار 200 روپے پر پہنچ گیا۔
تفصیلات کے مطابق بین الاقوامی مارکیٹس اور پاکستانی صرافہ بازاروں میں سونے کی قیمتوں میں اضافے کا سلسلہ جاری ہے۔
پاکستان میں آج فی تولہ سونے کی قیمت میں 1000 روپے اضافے کے ساتھ 3 لاکھ 4 ہزار 200 روپے پر پہنچ گئی۔
اسی طرح دس گرام سونا 857 روپے اضافے کے ساتھ 2 لاکھ 60 ہزار 802 روپے کا ہوگیا جبکہ چاندی کی فی تولہ قیمت 3 ہزار 350 روپے پر مستحکم رہی۔
عالمی مارکیٹ میں سونے کی قیمت میں 10 ڈالر فی اونس کا اضافہ ہوا، جس کے بعد بین الاقوامی مارکیٹ میں سونا بلند ترین سطح 2910 ڈالر پر پہنچ گیا۔
واضح رہے کہ سونا خریدنا روایتی طور پر محفوظ سرمایہ کاری سمجھا جاتا ہے جس کی قیمت افراط زر، سیاسی اور معاشی عدم استحکام کے اوقات میں بڑھ جاتی ہے۔
اسے صدیوں سے کرنسی اور دولت کی شکل کے طور پر استعمال کیا جاتا رہا ہے، جب سرمایہ کار دوسرے اثاثوں کے بارے میں غیر یقینی محسوس کرتے ہیں، تو وہ اکثر سونا خریدتے ہیں۔
پاکستان میں گزشتہ برس سونے کی قیمت کے تعین کے طریقہ کار میں تبدیلی کردی گئی تھی، جس کے تحت سونے کی قیمت انٹرنیشنل مارکیٹ ریٹ سے 20 ڈالر فی اونس زیادہ مقرر کی گئی۔
