کراچی : پاکستان میں ایک سہہ ماہی میں اتنا سونا خریدا گیا، جتنا گزشتہ تین سال میں نہیں خریدا گیا، ماہرین معیشت کا کہنا ہے کہ صورت حال یہی رہی توسونا مزید مہنگا ہوگا۔
تفصیلات کے مطابق ملک میں ڈالر نایاب ہوتے ہی سونا خریدنے کے رحجان میں اضافہ ہوگیا۔
تاجر برادری اور کاروباری افراد نے ڈالر کی جگہ سونا خریدنا شروع کردیا، جس کی وجہ سے پاکستان سونے کی قیمت بھی تاریخ کی بلند ترین سطح پر پہنچ گئی۔
پاکستان میں ایک سہہ ماہی کے دوران اتنا سونا خریدا گیا، جتنا گزشتہ تین سال میں بھی نہیں خریدا گیا، ورلڈ گولڈ کونسل کے مطابق رواں مالی سال جولائی تا ستمبر زرد دھات کی طلب چونتیس فیصد بڑھ کر تیرہ ٹن تک پہنچ گئی۔
ماہرین معیشت کا کہنا ہے موجودہ صورتحال یہی رہی تو سونا مزید مہنگا ہوگا، ڈالر نہ ہونے سے معیشت کا پہیہ جام ہونے لگا ہے۔
امپورٹرز اور ایکسپورٹرز کی پریشانیوں میں اضافہ ہوگیا کیونکہ ریگولر مارکیٹ کے بجائے مہنگے داموں اوپن مارکیٹ سے ڈالر خریدنے پر مجبور ہیں۔
