پاکستان اور عالمی مارکیٹ میں سونے کی قیمتوں میں مسلسل اضافے کے بعد کمی کا سلسلہ جاری ہے جس کے باعث ملک میں بھی سونا سستا ہو رہا ہے۔
آل پاکستان جیمز اینڈ جیولرز ایسوسی ایشن کے مطابق کاروباری ہفتہ کے پہلے روز بھی عالمی مارکیٹ میں سونے کی قیمت میں نمایاں کمی کے بعد پاکستان میں بھی سونے کی قیمت میں کمی ہوئی ہے۔
آج عالمی مارکیٹ میں سونا 16 ڈالر کی کمی سے 3289 ڈالر فی اونس کا ہو گیا۔ عالمی سطح پر قیمت میں اس گراوٹ کے بعد پاکستان میں فی تولہ سونے کی قیمت میں 1600 روپے کی کمی ہوئی ہے جس کے بعد سونا 3 لاکھ 47 ہزار 100 روپے فی تولہ ہو گیا ہے۔
اسی تناسب سے 10 گرام سونا بھی 1368 روپے کمی کے بعد 2 لاکھ 97 ہزار 582 روپے کا ہو گیا ہے۔
چاندی کی فی تولہ قیمت پاکستان میں مستحکم رہی اور 3497 روپے فی تولہ پر برقرار ہے۔
واضح رہے کہ گزشتہ ہفتہ سونے کی قیمت نے پاکستان میں تاریخ کی بلند ترین سطح کو چھو لیا تھا اور فی تولہ قیمت 3 لاکھ 63 ہزار روپے سے بھی تجاوز کر گئی تھی۔
سونا خریدنا روایتی طور پر محفوظ سرمایہ کاری سمجھا جاتا ہے جس کی قیمت افراط زر، سیاسی اور معاشی عدم استحکام کے اوقات میں بڑھ جاتی ہے۔
اسے صدیوں سے کرنسی اور دولت کی شکل کے طور پر استعمال کیا جاتا رہا ہے، جب سرمایہ کار دوسرے اثاثوں کے بارے میں غیر یقینی محسوس کرتے ہیں، تو وہ اکثر سونا خریدتے ہیں۔
پاکستان میں گزشتہ برس سونے کی قیمت کے تعین کے طریقہ کار میں تبدیلی کردی گئی تھی، جس کے تحت سونے کی قیمت انٹرنیشنل مارکیٹ ریٹ سے 20 ڈالر فی اونس زیادہ مقرر کی گئی۔
