اسلام آباد: فیڈرل بورڈ آف ریونیو (ایف بی آر) نے انکم ٹیکس گوشوارے جمع کرانے کی تاریخ میں توسیع کا اعلان کردیا۔
ایف بی آر کی جانب سے جاری نوٹی فکیشن کے مطابق انکم ٹیکس جمع کرانے کی آخری تاریخ میں 15 دسمبر تک توسیع کی گئی ہے۔
قبل ازیں فیڈرل بورڈ آف ریونیو نے انکم ٹیکس ریٹرن کی آخری تاریخ 30 نومبر مقرر کی تھی اور اس میں توسیع نہ کرنے کا فیصلہ بھی کیا تھا، ایف بی آر نے تمام فائلرز کو ہدایت کی تھی کہ وہ مقررہ تاریخ تک ہر صورت اپنے گوشوارے جمع کرادیں۔
دو روز قبل 27 نومبر 2018 کو وزیرمملکت برائے ریونیو حماد اظہر نے اعلان کیا تھا کہ حکومت نے دیر سے ٹیکس ریٹرن جمع کرانے والوں پر عائد جرمانہ ختم کردیا۔
مزید پڑھیں: مقررہ تاریخ کے بعد ٹیکس ریٹرن جمع کرانے والوں پر کوئی جرمانہ نہیں ہوگا، حکومتی اعلان
سماجی رابطے کی ویب سائٹ ٹویٹر پر حماد اظہر نے ٹیکس فائلرز کو بڑی خوش خبری سناتے ہوئے کہا تھا کہ ’حکومت نے مقررہ تاریخ کے بعد ریٹرن جمع کرانے والوں پر عائد ہونے والے جرمانے کو ختم کردیا کیونکہ یہ گزشتہ حکومت نے عائد کیا تھا۔
اُن کا کہنا تھا کہ تحریک انصاف کی حکومت ٹیکس دینے والوں کو سہولیات دینے کے لیے پرعزم ہے، اسی باعث ٹیکس فائلرز کے آڈٹ اور مقررہ تاریخ کے بعد ریٹرن فائل کرانے والوں پر کوئی جرمانہ عائد نہیں کیا جائے گا۔
گزشتہ دورِ حکومت میں انکم ٹیکس ریٹرن کی مقررہ تاریخ گزر جانے کے بعد فائلر کو اضافی رقم بطور جرمانہ ادا کرنا پڑتی تھی اس کے علاوہ آڈٹ کے مرحلے سے بھی گزرنا پڑتا تھا۔
