کیلی فورنیا: گوگل نے اربوں صارفین سے پاکستان کے سیلاب متاثرین کے لئے عطیات دینے کی اپیل کردی۔
تفصیلات کے مطابق معروف سرچ انجن گوگل بھی پاکستان کے سیلاب متاثرین کی مدد کو میدان میں آگیا۔
گوگل نے پاکستان میں سیلاب متاثرین کے لیے بین الاقوامی اپیل کا آغاز کر دیا اور دنیا بھر میں اربوں صارفین سے عطیات دینے کی اپیل کرتے ہوئے سینٹر فار ڈیزاسٹر، فلن تھرافی پراور سپورٹ ریکوری ناؤ کا لنک ایکٹویٹ کردیا ہے۔
جس کو کلک کرکے پچیس اور پچاس سے لیکر ہزاروں ڈالر تک عطیات دئیے جاسکتے ہیں ۔
یاد رہے سرچ انجن گوگل نے پاکستانی سیلاب متاثرین کیلئے 5 لاکھ ڈالرز امداد کا اعلان کیا تھا۔
جنوبی ایشیا کیلئے گوگل کے نائب صدر اسٹیفنی ڈیوس نے کہا تھا کہ کمپنی یہ رقم جو کہ پاکستانی روپے میں تقریباً 11 کروڑ روپے کے برابر بنتی ہے، Google.org کے ذریعے سینٹر فار ڈیزاسٹر فلانتھراپی کو عطیہ کرے گی۔
ان کا کہنا تھا کہ پاکستان میں سیلاب سے متاثر ہونے والے افراد سے ہمدردی ہے، پاکستان میں سب کو سیلاب متاثرین کی مدد کیلئے آگے بڑھتے دیکھا، ہم پاکستانیوں کے اس جذبے سے متاثر ہوئے ہیں اور ہم بھی مدد کرنا چاہتے ہیں۔
