اسلام آباد:وفاقی حکومت نے انسانی بنیادوں پر سزا یافتہ خواتین اور بچوں کے لئے معافی کا اعلان کر دیا۔
تفصیلات کے مطابق وفاقی حکومت نے سزا یافتہ خواتین اور بچوں کے لئے معافی کا اعلان کر دیا، وزیراعظم کی منظوری کے بعد نوٹیفیکیشن بھی جاری کردیا گیا۔
نوٹیفکیشن کے مطابق دو سال یا کم سزا یافتہ عورتوں اور بچوں پر معافی کا اطلاق ہوگا، وزرات داخلہ نے چاروں صوبوں کو گائیڈ لائن جاری کر دی۔
نوٹیفکیشن کے مطابق قتل، جاسوسی، تخریب کاری، ریاست مخالف سرگرمیوں کے لیے سزا یافتہ قیدیوں پر اطلاق نہیں ہوگا۔
اس کے علاوہ اغوا، ڈکیتی، ڈکیتی اور زنا آرڈیننس، انسداد دہشت گردی ایکٹ، فارنرز ایکٹ اور کنٹرول آف نارکوٹک سبسٹنس (ترمیمی) ایکٹ کے تحت سزا پانے والوں کو بھی معافی نہیں ہو گی۔
نوٹیفکیشن کے مطابق وہ مرد قیدی جن کی عمر 65 سال یا اس سے زیادہ ہے اور وہ کم از کم ایک تہائی قید کی سزا سے گزر چکے ہیں ان کے لئے بھی معافی کا اعلان کیا گیا ہے۔
نوٹیفکیشن میں مزید کہا گیا کہ مالی غبن اور قومی خزانے کو نقصان پہنچانے کے مقدمات میں سزا یافتہ قیدی معافی کے حقدار نہیں ہوں گے۔
