کراچی: شہر قائد کے علاقے نیپا چورنگی پر سرکاری اسپتال کا منصوبہ بھی تاخیر کا شکار ہو گیا ہے، جس کی لاگت بڑھ کر 4 ارب تک پہنچ گئی ہے۔
تفصیلات کے مطابق کراچی کے علاقے نیپا چورنگی پر سرکاری اسپتال کا منصوبہ بھی رواں سال مکمل نہیں ہو سکے گا، محکمہ صحت نے 2009 میں اس کا سنگ بنیاد رکھا تھا، اور اس کا کام 43 کروڑ روپے کی لاگت سے شروع کیا گیا تھا۔
ذرائع کے مطابق 2020 میں انفیکشن ڈیزیز سینٹر کا نام دے کر ایک بلاک میں کام شروع کیا گیا، 2022 میں ایک اور بلاک کو حتمی شکل دی گئی تھی، اور اس وقت بھی 2 بلاکس میں ترقیاتی کام تاحال جاری ہے۔
ذرائع کا کہنا ہے کہ اسپتال میں سی بلاک آئندہ مالی سال میں مکمل ہوگا، تاہم 43 کروڑ رروپے سے بڑھ کر اس منصوبے کی لاگت اب 4 ارب روپے ہو جائے گی، جب کہ اب تک پروجیکٹ پر 62 کروڑ روپے سے زائد رقم خرچ کی جا چکی ہے۔
محکمہ صحت کی غفلت، بچوں کے دل کے امراض کا پروجیکٹ انتہائی تاخیر کا شکار
بجٹ دستاویز کے مطابق رواں سال نیپا اسپتال کے لیے 25 کروڑ روپے مختص کیے گئے ہیں۔
