الیکشن کمیشن نے کے پی میں عام انتخابات کیلیے گورنر سے تاریخ ملنے کی تردید کردی ہے اور ترجمان کا کہنا ہے کہ گورنر خیبرپختونخوا نے الیکشن کے حوالے سے کوئی تاریخ نہیں دی ہے۔
اے آر وائی نیوز کے مطابق خیبرپختونخوا کی اسمبلی تحلیل ہونے کے بعد وہاں نگراں حکومت قائم ہے اور آئین کے مطابق وہاں 90 روز میں عام انتخابات ہونے ہیں تاہم تاحال الیکشن کی تاریخ کا اعلان نہیں کیا گیا ہے۔
گزشتہ روز اس حوالے سے گورنر خیبرپختونخوا کی جانب سے صوبے میں عام انتخابات کے لیے الیکشن کمیشن کو خط لکھا گیا تھا اور کمیشن کے ذرائع کے مطابق اس خط میں گورنر نے الیکشن کمیشن کو انتخابات کے لیے 16، 17 اور 18 اپریل کی تاریخ دی تھی۔
تاہم آج الیکشن کمیشن نے کے پی میں گورنر کی جانب سے عام انتخابات کی تاریخ ملنے کی واضح تردید کردی ہے اور ترجمان الیکشن کمیشن نے کہا ہے کہ گورنر خیبرپختونخوا کی جانب سے صوبے میں عام انتخابات کے لیے کوئی تاریخ نہیں دی گئی ہے۔
دوسری جانب الیکشن کمیشن کا اہم اجلاس آج ہوگا جس میں کے پی میں الیکشن کے حوالے سے غور وخوض کیا جائے گا۔
ذرائع کے مطابق الیکشن کمیشن کو خیبرپختونخوا میں انتخابات کی تیاریوں کیلئے 54 دن درکار ہیں۔
الیکشن کمیشن نے عام انتخابات کے لیے پنجاب اور کے پی کے گورنرز کو مراسلے ارسال کیے تھے جس پر گورنر کے پی کا جوابی خط الیکشن کمیشن کو موصول ہوچکا ہے جب کہ پنجاب کے گورنر نے تاحال کوئی جواب نہیں دیا ہے۔
یہ بھی پڑھیں: گورنر کے پی نے الیکشن کمیشن کو انتخابات کی تاریخ بھجوا دی
الیکشن کمیشن نے اپنے مراسلے میں دونوں صوبوں میں ٹرانسفر پوسٹنگ جلد مکمل کرنےکی ہدایت کرتے ہوئے کہا ہے کہ صوبوں کے چیف سیکرٹریز اور آئی جیز کو جلد تبدیل کرلیں، شفاف الیکشن کےانعقادکیلئےہرممکن ٹرانسفرپوسٹنگ کاعمل مکمل کیا جائے۔
خط کے مطابق الیکشن کمیشن جلد صوبوں میں عام انتخابات کا شیڈول جاری کرےگا۔ انتخابی شیڈول کے بعد کسی بھی قسم کی ٹرانسفرپوسٹنگ بندکردی جائےگی۔
