اسلام آباد : گورنر سندھ نے پیپلزپارٹی کے شریک چیئرمین آصف زرداری سے ملاقات کی اس موقع پر کنوینئر ایم کیوایم پاکستان ڈاکٹر خالد مقبول صدیقی اور سابق میئر کراچی وسیم اختر بھی موجود تھے۔
اس حوالے سے ذرائع کا کہنا ہے کہ اسلام آباد میں ملاقات کے دوران ملک کی مجموعی سیاسی صورتحال پرتبادلہ خیال کیا گیا۔
ملاقات میں سندھ حکومت کے ساتھ بہتر ورکنگ ریلیشن شپ اور کراچی کو روشنیوں کا شہر بنانے پر گفتگو کے علاوہ شہر کے ترقیاتی منصوبوں سمیت عوامی فلاح وبہبود کے دیگراقدامات پر تبادلہ خیال کیا گیا۔
ملاقات کے دوران دونوں جانب سے سیلاب متاثرین کی بحالی کی کوششوں پر بھی بات چیت اور سندھ کی تعمیر و ترقی کے لئے باہمی مشاورت کے عزم کا اظہار کیا گیا۔
گورنرکامران ٹیسوری نے کہا کہ صوبے کی تعمیر و ترقی میں وفاق کا کردار اہم ہے، تمام اسٹیک ہولڈرز سے مشاورت کا سلسلہ جاری ہے،انہوں نے کہا کہ ترقیاتی منصوبوں سے انفرا اسٹرکچر میں بہتری آئے گی۔
اس موقع پر پیپلزپارٹی کے شریک چیئرمین آصف زرداری نے کہا کہ صوبہ کی ترقی کیلئے گورنر سندھ کی کاوشیں لائق تحسین ہیں۔
