کراچی : گورنر سندھ کامران ٹیسوری نے نئے سال کی آمد کا جشن منانے کیلئے عوام سے نمائش چورنگی پہنچنے کی اپیل کردی۔
سال 2022 کی آخری رات کو الوداع اور نئے سال کو خوش آمدید کہنے کیلئے ہر سال کی طرح اس سال بھی شہر کراچی میں جشن کا سماں ہوگا۔
اس حوالے سے گورنر سندھ کامران ٹیسوری بھی کافی پرجوش دکھائی دے رہے ہیں، ان کی جانب سے نمائش چورنگی کراچی پر آتش بازی کا اہتمام کیا گیا ہے۔
گورنر سندھ کامران ٹیسوری خود عوام کا استقبال کریں گے، کراچی کی مرکزی نمائش چورنگی پر نیوائیرنائٹ کے موقع پر آتش بازی کا مظاہرہ کیا جائے گا۔
گورنر سندھ نے عوام سے اپیل کی ہے کہ آتش بازی کا شاندار مظاہرہ دیکھنے کیلئے نمائش چورنگی پہنچیں اور نئے سال کی خوشیاں ہم مل کر ساتھ منائیں گے۔
یاد رہے کہ آج صبح سندھ حکومت نے چند گھنٹوں بعد ہی دفعہ 144 کے نفاذ کے فیصلے پر یوٹرن لیتے ہوئے سال نو پر موٹر سائیکل پر ڈبل سواری پر پابندی کا فیصلہ واپس لے لیا تھا۔
مزید پڑھیں : سال نو پر ڈبل سواری پر پابندی کا فیصلہ واپس
محکمہ داخلہ سندھ کی جانب سے سال نو کے موقع دفعہ 144 نافذ کی گئی تھی اور کمشنر کراچی نے ڈبل سواری پر پابندی کا نوٹفیکیشن جاری کردیا۔
اس فیصلے کے کچھ دیر بعد ہی صوبائی وزیر اطلاعات شرجیل میمن نے شہریوں کو خوشخبری دی کہ سال نو کے موقع پر موٹر سائیکل پر ڈبل سواری پر پابندی نہیں ہے، شہری نئے سال کا جشن بھرپور طریقے سے منائیں۔
