اسلام آباد : حکومت نے آئی ایم ایف کو نجکاری پروگرام پر کام تیز کرنے کی یقین دہانی کرادی ، 25 ادارے نجکاری کی فعال فہرست میں شامل ہیں۔
تفصیلات کے مطابق وزیرخارجہ اسحاق ڈارنے کابینہ کی نجکاری کمیٹی کا پہلا اجلاس کل طلب کرلیا، کابینہ نجکاری کمیٹی کے اجلاس میں2 نکاتی ایجنڈے پرغور کیا جائے گا۔
ذرائع نے بتایا کہ اجلاس میں نجکاری پالیسی کی تشکیل کی سمری پیش کی جائے گی، نجکاری پروگرام کی موجودہ صورتحال کا جائزہ ایجنڈے میں شامل ہیں جبکہ نجکاری کےجاری پروگرام کی پیشرفت کا جائزہ لیا جائے گا۔
ذرائع کا کہنا ہے کہ حکومت کی آئی ایم ایف کونجکاری پروگرام پرکام تیز کرنے کی یقین دہانی کرادی ہے ، 25 ادارے نجکاری کی فعال فہرست میں شامل ہیں۔
ذرائع نے کہا کہ ہوا بازی شعبےکا ایک ادارہ پی آئی اے نجکاری فہرست میں شامل ہیں ، اس کے علاوہ فنانشل اور ریئل اسٹیٹ سےمتعلق4،4ادارے، انڈسٹریل سیکٹرکے2 ادارے ، توانائی شعبےکے14 ادارے نجکاری پروگرام کا حصہ ہیں۔
نجکاری کے پروگرام میں اسٹیٹ لائف انشورنس کارپوریشن ، بلوکی، حویلی بہادر،گدو اورنندی پورپاورپلانٹس سمیت تمام 10 سرکاری بجلی تقسیم کار کمپنیاں فعال نجکاری فہرست میں شامل ہیں۔
ہاؤس بلڈنگ فنانس کارپوریشن،فرسٹ ویمن بینک ، پاکستان انجینئرنگ کمپنی اور سندھ انجینئرنگ لمیٹڈ بھی فہرست میں شامل ہیں۔
