اسلام آباد : حکومت کی جانب سے سرکاری حج اسکیم کیلئے درخواستیں آئندہ ماہ کے وسط تک طلب کی جائیں گی، ڈالرز میں ادائیگی کرن کی صورت میں قرعہ اندازی سے استثنیٰ حاصل ہوگا۔
تفصیلات کے مطابق وفاقی کابینہ سے حج پالیسی 2024 نومبر کے آغاز میں منظور ہونے کا امکان ہے، مجوزہ سرکاری حج پیکج میں عوامی تجاویز پر کئی تبدیلیاں کردی گئیں۔
ذرائع کا کہنا ہے کہ سرکاری حج اسکیم کیلئے درخواستیں آئندہ ماہ کے وسط تک طلب کی جائیں گی، حج کیلئے ادائیگی ڈالرز میں کرنے کی صورت میں قرعہ اندازی سے استثنیٰ حاصل ہوگا۔
ذرائع نے بتایا کہ پہلی بار اضافی رقم کیساتھ بیس سے پچیس دن کا شارٹ حج پیکج بھی متعارف کرایا جارہا ہے۔
ذرائع نے مزید کہا کہ سمندر پار پاکستانیوں کیلئے سپانسر شپ حج اسکیم جاری رکھی جائے گی اور حج اخراجات کی ادائیگی ڈالرز میں کرنے کی صورت میں قرعہ اندازی سے استثنیٰ حاصل ہوگا۔
ذرائع کے مطابق مدینہ منورہ میں رہائش کیلئے 4 سے 8 دن کا انتخاب کیا جا سکے گا، شناخت کیلئے حجاج کے دیئے جانے والےبیگ پر پاکستانی پرچم، کیوآرکوڈ اور کوائف درج ہوں گے۔
ذرائع کا کہنا تھا کہ حج درخواستوں کے آن لائن اندراج کیلئے موبائل ایپ کا اجرا کیا جائے گا، اکانومی پیکج ماضی کی طرح 40 دن پرہی محیط ہوگا۔
ذرائع نے کہا کہ اگلے سال سرکاری حج اسکیم کے تحت 90 ہزار سے زائدعازمین فریضہ حج ادا کریں گے۔
