اسلام آباد : حکومت نے متحدہ عرب امارات کو پانچ بڑی کمپنیوں کی فروخت کی پیشکش کردی، جن میں اوجی ڈی سی ایل، پی پی ایل، نیشنل بینک، پی آئی اے اور پی این ایس سی شامل ہیں۔
تفصیلات کے مطابق موجودہ حکومت نے یو اے ای کی دو بڑی کمپنیوں کو ریاستی اداروں کے حصص کی پیشکش کردی۔
ذرائع نے بتایا ہے کہ حکومت یواے ای سے ایک ارب ڈالر لینے کیلئے اوجی ڈی سی ایل۔ پی پی ایل۔ نیشنل بینک۔ پی آئی اے اور پی این ایس سی کے حصص فروخت کرسکتی ہے۔
اس سلسلے میں ابوظبی ڈیولپمنٹ ہولڈنگ کمپنی اور انٹرنیشنل ہولڈنگ کمپنی کو پیشکش کی گئی ہے، مذکورہ دونوں یواےای کمپنیوں کے پاس تین سوارب ڈالرکے سرمایہ کاری فنڈزکا پورٹ فولیو ہے۔
دونوں کمپنیوں نے پاکستان میں منافع بخش عوامی اداروں میں سرمایہ کاری میں دلچسپی بھی ظاہرکی ہے۔
اس سلسلے میں صدرمملکت ڈاکٹرعارف الرحمان علوی وزیراعظم شہبازشریف کی ایڈوائس پر پیرکو ریاستی کمپنیوں کےحصص کی فروخت کیلئےگورننس اینڈ آپریشنز بل دوہزاربائیس کی منظوری دے چکے ہیں۔
