کراچی: چیئرمین پیپلزپارٹی بلاول بھٹو زرداری کا کہنا ہے کہ پوری قوم دہشت گردی کی ہر شکل میں مذمت کے لیے متحد ہے۔
اے آر وائی نیوز کے مطابق چیئرمین پیپلزپارٹی بلاول بھٹو نے گوادر پورٹ اتھارٹی کمپلیکس میں دہشتگرد حملے کی مذمت کرتے ہوئے کہا کہ بزدلانہ کارروائیوں کا مقصد قوم کے استحکام و ترقی کو نقصان پہنچانا ہے۔
انہوں نے کہا کہ بطور قوم ایسی گھناؤنی حرکتوں سے خوفزدہ یا مایوس ہونے سے انکار کرتے ہیں۔
بلاول بھٹو نے کہا کہ فورسز کے جوان انتہا پسند عناصر کے خلاف نبرد آزما ہیں، جی پی اے کمپلیکس پر حملے کو ناکام بنانے والے جوانوں کو سلام پیش کرتا ہوں۔
انہوں نے مزید کہا کہ مل کر تمام چیلنجوں پر قابو پالیں گے اور پہلے سے زیادہ مضبوط ہوکر ابھریں گے۔
واضح رہے کہ سکیورٹی فورسز نےگوادر پورٹ اتھارٹی کمپلیکس پرکالعدم بی ایل اے کے دہشت گردوں کا حملہ ناکام بناتے ہوئے تمام 8 حملہ آوروں کو ہلاک کردیا۔
