ریاض: سعودی عرب میں ٹیکنالوجی کی دنیا سے خوش خبری سامنے آگئی، اب انٹرنیٹ صارفین کو 5 جی نیٹ ورک فراہم کیا جائے گا، مجلس شوریٰ نے خصوصی ہدایت جاری کردی۔
تفصیلات کے مطابق سعودی عرب میں مجلس شوریٰ نے انٹرنیٹ فراہم کرنے والی کمپنیوں کو خصوصی ہدایت کرتے ہوئے کہا ہے کہ وہ ملک میں صارفین کے لیے 5 جی نیٹ ورک کی فراہمی یقینی بنائیں۔
غیر ملکی خبررساں ادارے کے مطابق سعودی عرب میں اب شہریوں کو 5 جی کی جدید انٹرنیٹ سروس فرائم کی جائے گی، جس کے لیے انفارمیشن اینڈ کمیونیکیشن کمیشن(آئی سی سی) کو بھی ہدایت کی گئی ہے کہ وہ انٹرنیٹ سروس فراہم کرنے والی کمپنیوں کو ضروری سہولتیں فراہم کرے۔
سعودی عرب: انٹرنیٹ کالنگ پر عائد پابندی ختم کرنے کا اعلان
اس حکم پر عمل درآمد کے لیے انفارمیشن اینڈ کمیونیکیشن کمیشن کا ادارہ انٹرنیٹ فراہم کرنے والی کمپنیوں کو مدد فراہم کرے گا۔ اس اپ ڈیٹ کے بعد ناصرف انٹرنیٹ کی سہولیات میں بہتری آئے گی بلکہ صارفین بھی مناسب قیمت ادا کریں گے۔
سعودی عرب کی مجلس شوریٰ نے آئی سی سی کو کنگ عبد العزیز سٹی برائے سائنس اینڈ ٹیکنالوجی اور سائبر کرائم کے ادارے کے تعاون سے انٹرنیٹ نیٹ ورک کے لیے ٹھوس بنیادی ڈھانچہ قائم کرنے کی بھی ہدایت کردی۔
