یورپی ملک یونان جانے کے خواہش مند افراد کے لئے اہم خبر سامنے آگئی، یونان نے ملک میں چند لاکھ یوروز کی سرمایہ کاری کرنے والوں کے لیے 5 سال کے ریزیڈنٹ پرمٹ کی سکیم متعارف کروائی ہے، جسے گولڈن ویزا بھی کہا جاتا ہے۔
بین الاقوامی خبر رساں ادارے کی رپورٹ کے مطابق رہائشی اجازت نامہ خریداروں کے خاندان کے افراد (فرسٹ ڈگری رشتہ داروں) پر بھی لاگو ہوتا ہے اور ایسے رشتہ داروں کو بھی 5 سال کا ویزا ملتا ہے۔ یونان کے اس گولڈن ویزے کے حامل افراد پوری یورپی یونین میں آزادانہ طور پر منتقل ہو سکتے ہیں۔
یورپی یوین سے باہر کے کسی بھی ملک کا کوئی شہری جو چاہتا ہے کہ یونان کا گولڈن ویزا حاصل کرلے، اسے یونان کے بڑے شہروں یا جزائر میں 8 لاکھ یورو کی سرمایہ کاری کرنے کی ضرورت ہے، تاہم کئی دیگر علاقوں میں صرف 4 لاکھ یورو کی سرمایہ کاری کی شرط رکھی گئی ہے۔
یورپی ملک یونان کی وزارت خزانہ کے مطابق خریدی گئی جائیدادیں کرائے پر تو دی جا سکتی ہیں لیکن انہیں ‘ایئر بی این بی‘ جیسے پلیٹ فارمز پر ‘ہالیڈے ہومز‘ کے طور پر کرائے پر نہیں دے سکتے۔
یونانی میڈیا کا کہنا ہے کہ حالیہ برسوں میں غیر ملکی سرمایہ کاروں کی جانب سے ریئل اسٹیٹ کی خریداری کے باعث اپارٹمنٹس اور مکانات کی قیمتوں میں بڑا اضافہ ہوا ہے۔
سعودی فرمانروا نے اہم شاہی فرمان جاری کردیا
یونان کی وزارت خزانہ کا کہنا ہے کہ سال 2023 میں یونان میں گولڈن ویزوں کے اجرا سے ڈھائی ارب یورو کی آمدنی حاصل ہوئی تھی، گزشتہ سال یونان میں غیر ملکی سرمایہ کاروں کی طرف سے مکانوں کی خریداری کی کل 8516 درخواستیں جمع کرائی گئیں، ان میں سے 1802 سرمایہ کاروں کو املاک کی خریداری کی اجازت بھی مل گئی تھی۔
