گوجرانوالہ : یونان کشتی حادثے میں مزید 4 پاکستانیوں کی لاشیں مل گئیں اور حادثے میں جاں بحق پاکستانیوں کی تعداد 9 ہوگئی۔
تفصیلات کے مطابق وفاقی تحقیقاتی ادارے ( ایف آئی اے) کی جانب سے کہا گیا ہے کہ یونان کشتی حادثے میں مزید 4 پاکستانیوں کی لاشیں مل گئیں، جس کے بعد کشتی حادثے میں جاں بحق پاکستانیوں کی تعداد 9 ہوگئی۔
ایف آئی اے کا کہنا تھا کہ نارووال کے رہائشی شبیر، زین علی اور ذیشان کی لاشیں ملی ہیں، جائے حادثہ کے قریب سے ملنے والی چوتھی لاش سیالکوٹ کے اویس علی کی ہے۔
حکام نے بتایا کہ میتیں یونان کے جزیرے گیواڈوس سے ایتھنز کے اسپتال میں منتقل کی گئی ہیں ، پاکستانی سفارتخانہ میتیں بھجوانے کیلئے انتظامات کر رہا ہے تاہم میتوں کو پاکستان لانے میں ایک ہفتہ لگ سکتا ہے۔
دوسری جانب انسانی اسمگلنگ میں ملوث عناصرکیخلاف کریک ڈاؤن جاری ہے ، ایف آئی اے اسلام آباد زون نے بڑی کاروائیوں میں 6 ملزمان کو گرفتار کرلیا۔
ڈائریکٹرایف آئی اے زون نے بتایا کہملزمان میں لیبیا کشتی حادثے کے انتہائی مطلوب انسانی اسمگلر بھی شامل ہیں، سرگودھا، فیصل آباد اور اسلام آباد میں چھاپے مارے گئے، احمد نواز، محمد ارشد، مظہر خان اور منشا لیبیا کشتی حادثے میں ملوث ہیں۔
لیبیا کشتی حادثے کے 9 متاثرین سے 5 کروڑ 16 لاکھ روپے ہتھیائے گئے تھے، ملزمان ویزا فراڈ کرکےغیر قانونی طور پرشہریوں کو بیرون ملک بھجواتے تھے۔
