کراچی: گلستان جوہر تھانے پر 80 سے زائد افراد نے حملہ کردیا، پولیس کا کہنا ہے کہ حملہ کرنے والے کباڑی ہیں۔
اے آر وائی نیوز کے مطابق پولیس کا کہنا ہے کہ 3 کباڑیوں کو چوری کا مال خریدنے پرحراست میں لیا گیا تھا، ملزمان چھڑانے کیلئے کباڑیوں کے صدر اقبال رند کی سربراہی میں تھانے پر حملہ کیا گیا۔
پولیس حکام کے مطابق لاٹھی چارج کے بعد حملہ آور منتشر ہوگئے، جبکہ 6 کباڑیوں کو گرفتار کرلیا گیا ہے۔ واقعے کے 2 مختلف مقدمات تھانہ گلستان جوہر میں درج کرلئے گئے۔ مقدمہ میں حملے میں ملوث مرکزی ملزم اقبال رند کو بھی نامزد کیا گیا ہے۔
پولیس کا کہنا ہے کہ دونوں مقدمات سرکاری مدعیت میں درج کئے گئے، پہلا مقدمہ چوری کی دفعات کے تحت درج کیا گیا جبکہ دوسرا مقدمہ تھانے پر حملے میں ملوث افراد کیخلاف درج کیا گیا۔
کراچی سے بھارتی خفیہ ایجنسی ’را‘ کے مزید 2 دہشتگرد گرفتار
مقدمہ میں دہشتگردی، ہنگامہ آرائی، پولیس مقابلے سمیت دیگر دفعات شامل کی گئی ہیں۔ مقدمہ میں گرفتار 6 ملزمان سمیت 80 سے زائد نامعلوم افراد شامل ہیں۔
