پسنی : بلوچستان کی پہلی موٹروے کا افتتاح کردیا گیا۔ وزیراعظم نواز شریف نے کہا ہے کہ وسط ایشائی ملک گوادرکےراستےتجارت کرنا چاہتےہیں.
تفصیلات کے مطابق وزیر اعظم نواز شریف،آرمی چیف ،اور وزیر اعلیٰ بلوچستان نے مل کر گوادرہوشاب شاہراہ کا افتتاح کیا۔
ہوشاب تربت شاہراہ کی افتتاحی تقریب سے خطاب کرنے کے بعد وزیراعظم نوازشریف نے منصوبے کا افتتاح کیا اور اس موقع پر راحیل شریف بھی ہمراہ تھے.
دعا کے بعدوزیر اعظم نواز شریف آرمی چیف کے ساتھ گاڑی میں بیٹھے ۔آرمی چیف نے ڈرائیونگ سیٹ سنبھالی اور دونوں نے منصوبے کا معائنہ کیا۔ ڈرائیونگ کرتے ہوئے دونوں منصوبے پر تبادلہ خیال بھی کرتے رہے.
افتتاحی تقریب میں ڈی جی ایف ڈبلیواو میجر جنرل محمد افضل نے منصوبے پر وزیر اعظم کو بریفنگ دی ۔تقریب سے خطاب میں وزیر اعظم نے کہاکہ بلوچستان کو ملک کے دوسرے حصوں کے برابر لارہےہیں.
وزیراعظم نوازشریف کا کہنا تھا کہ 870 کلومیٹر میں سے 632 کلومیٹر طویل سڑک صرف ڈیڑھ سال کے عرصہ میں مکمل ہو ئی اورمنصوبے کی تکمیل پر بلوچستان کو مالی کمی کا سامنا نہیں کرنا پڑے گا۔
وزیراعظم نےکہاکہ وسط ایشیائی ملک گوادر کے ذریعے تجارت کے خواہشمند ہیں، ایک سو ترانوے کلومیٹر طویل گوادر تربت ہوشاب شاہراہ پاک چین اقتصادی راہ داری کا حصہ ہے۔جس کی تعمیرپر تیرہ ارب روپے لاگت آئی۔
انہوں نے کہا کہ شاہراہ کے ذریعے گوادر کا چین سے رابطہ ہوجائے گا۔
