پاکستان ٹیم کے سابق ڈائریکٹر محمد حفیظ نے انکشاف کیا ہے کہ انھیں بابر اعظم کو نمبر تین پوزیشن پر کھیلنے کیلئے رضامند کرنے میں دو ماہ لگے۔
دورہ نیوزی لینڈ کے حوالے سے ٹیم کے انتخاب پر اے اسپورٹس پر اپنے خیالات کا اظہار کرتے ہوئے پاکستان کے سابق کپتان کا کہنا تھا کہ پاکستان ٹیم کے لیے 5 اور 6 نمبر کے اوپر آپشن نہیں تھا جس کی وجہ سے اسکواڈ میں 7 اوپنرز کو سلیکٹ کرنا پڑا۔
انھوں نے کہا کہ نیوزی لینڈ میں ٹی ٹوئنٹی کے لیے جو سلیکشن ہوئی ہے اس میں چھ اوپنرز تھے۔ رضوان اور بابر ایسے دو اوپنرز ہیں جو تین سال سے کھیل رہے ہیں۔ فخر کو پہلے ہی نمبر تین پر لے آئے ہیں تو کیسے باقی تین اوپنرز کو ایڈجسٹ کرتے، یہ میرے لیے بہت مشکل ٹاسک تھا۔
سابق کپتان نے انکشاف کیا کہ مجھے بابر اعظم کو اس بات رضامند کرنے میں کہ وہ نمبر تین کی پوزیشن پر بیٹنگ کریں دو ماہ لگے۔ میں نے انھیں کہا کہ آپ کو پاکستان کے لیے یہ کرنا ہوگا اور آپ پہلے کھلاڑی نہیں ہیں جو ایسا کریں گے۔
میں نے انھیں کہا کہ آپ بہت ہی بہترین پلیئر ہیں اور آپ بہت اچھی کرکٹ کھیل رہے ہیں لیکن ہمیں پاکستان کی ٹیم بنانی ہے۔ آپ اور رضوان بہت اچھے ہیں لیکن آپ پوری ٹیم نہیں ہیں ہمیں ایک ٹیم بنانے کی ضرورت ہے اور اس لیے میں چاہتا ہوں کہ آپ نمبر تین کی پوزیشن پر بیٹنگ کریں۔
محمد حفیظ نے بتیا کہ انھوں نے بابر سے کہا کہ آپ پچھلے چھ سالوں سے ون ڈے کرکٹ میں اس پوزیشن پر کھیل رہے ہیں، آپ کو کوئی فرق نہیں پڑے گا، تکنیکی طور پر آپ بہت بہتر ہیں۔
سابق ٹیم ڈائریکٹر نے کہا کہ بابر نے اس بات کو قبول کیا اور پاکستان کے لیے نمبر تین کی پوزیشن پر کھیلے۔ تاہم اگر آپ کسی بھی فرنچائز کی بات کریں گے تو جو پرفارمر نظر آتے ہیں وہ اوپنر یا نمبر تین کے پلیئر ہیں کیوں کہ نمبر 5 اور 6 کے اوپر کوئی کھیلنا نہیں چاہتا
انھوں نے اپنی بات جاری رکھتے ہوئے کہا کہ یہاں نمبر 5 یا 6 کی بات نہیں ہورہی بلکہ مقصد یہ ہے کہ اس پوزیشن پر کھیلتے ہوئے کوئی پلیئر کتنا موثر ہوتا ہے۔
