جماعت اسلامی کے امیر حافظ نعیم الرحمان نے کہا ہے کہ کسان بڑی تحریک کیلئے تیار رہیں، ن لیگ والوں سے حساب لیں گے۔
تفصیلات کے مطابق لاہور میں خطاب کرتے ہوئے جماعت اسلامی پاکستان کے امیر حافظ نعیم کا کہنا تھا کہ ہم گندم درآمد کا حساب ان سے لیں گے، گندم موجود تھی پھر بھی 280 ارب کی درآمد کی گئی، ساڑھے 3 ہزارارب روپے یہ پاکستان سے لے گئے۔
حافظ نعیم الرحمان نے کہا کہ یہ حکومت پی ڈی ایم ٹو ہے۔ مافیا کے خلاف جدوجہد اور دھرنے تیز کرنے کی ضرورت ہے، ملکی معیشت کو جاگیرداروں نے تباہ کیا۔
امیرجماعت اسلامی نے کہا کہ اب حکمرانوں سے حساب لیں گے۔ گرفتار کسانوں کو فوری طور پر رہا کیا جائے۔
انھوں نے کہا کہ 24 ماہ میں ن لیگ، پی پی اور ایم کیو ایم کی حکومت رہی ہے۔ نگراں حکومت بھی پاکستان مسلم لیگ ن، پاکستان پیپلز پارٹی اور متحدہ قومی موومنٹ کا تسلسل تھی۔
حافظ نعیم نے کہا کہ یہ حکومت پاکستان میں کرتے ہیں اور سرمایہ کاری دبئی میں کرتے ہیں، ہر ادارہ اپنے آئینی دائرے میں رہے۔
