امیر جماعت اسلامی پاکستان حافظ نعیم الرحمان کا کہنا ہے کہ جتنی بھی حکومتیں آئیں سب نے بجلی کے نجی کارخانوں (آئی پی پیز) کو سپورٹ کیا، بات یہ نہیں بجلی سستی ہوگئی بلکہ اصل میں جنہوں نے فراڈ کیا ان کو سامنے لائیں، وزیر اعظم شہباز شریف سے مطالبہ کرتا ہوں فرانزک آڈٹ کروائیں۔
کراچی میں نیوز کانفرنس کرتے ہوئے حافظ نعیم الرحمان نے کہا کہ بجلی کی قیمتوں میں ریلیف زیادہ ملنا چاہیے تھا، ماضی میں جو کچھ ہوتا رہا اس میں ہر حکومت شامل رہی، ملک میں (ن) لیگ، پیپلز پارٹی، پی ٹی آئی اور پی ڈی ایم حکومتیں رہیں جنہوں نے آئی پی پیز کو سپورٹ فراہم کی ہے، پاکستان کے ساتھ کھلواڑ کرنے والوں کو قوم کے سامنے لانا پڑے گا۔
حافظ نعیم الرحمان نے کہا کہ جماعت اسلامی نے حکومت کو بھاگنے نہیں دیا بلکہ معاہدہ کیا، آئی پی پیز کو کیپسٹی پیمنٹ کے نام پر سب کچھ مل رہا ہے، آئی پی پیز والے ٹیکس بھی ادا نہیں کرتے، گزشتہ چند سالوں میں ان کو 1700 ارب روپے ٹیکس معاف کیا گیا۔
یہ بھی پڑھیں: قوم کو 15 روپے فی یونٹ بجلی دینے والا آج پابند سلاسل ہے، بیرسٹر سیف
انہوں نے کہا کہ جب معاملات چند مفاد پرست لوگوں کا ہو تو سب ایک ہو جاتے ہیں، پارٹیوں میں بیٹھے لوگ مافیاز ہیں ایک دوسرے کو سپورٹ کرتے ہیں، 7 اپریل کو لاہور میں مشاورت کے بعد لائحہ عمل کا اعلان کروں گا۔
پیٹرول کی قیمت پر امیر جماعت اسلامی پاکستان نے کہا کہ عالمی مارکیٹ میں پیٹرول کم سطح پر ہے جبکہ گزشتہ روز اس میں مزید کمی ہوئی ہے، پیٹرول پر ٹیکسز اور اضافی لیوی لی جا رہی ہے، پیٹرول سستا اور بجلی کی قیمت مزید کم ہونے تک کاروبار کیسے چلے گا؟
ان کا کہنا تھا کہ معیشت اس وقت مستحکم ہوگی جب آئی ٹی انڈسٹری کو فروغ ملے گا، ٹیکس پر ٹیکس لگا رہے ہیں مگر ایف بی آر کے 26 ہزار ملازمین کر کیا رہے ہیں؟ تنخواہ دار طبقہ اس وقت سب سے زیادہ ٹیکس دے رہا ہے، اندازے کے مطابق تنخواہ دار طبقہ اس سال بھی 500 ارب روپے ٹیکس جمع کروائے گا لیکن دوسری جانب زمیندار اور جاگیر دار صرف 4 سے 5 ارب روپے ٹیکس دیں گے۔
